د شهیدانو او معلولینو چارو وزارت د څارنې او ارزونې ریاست لپاره نوی رئیس معرفي او رسماً خپل کار یې پیل کړ
محترم محمد صابر ځواک د ریاست الوزراء عالي مقام د حکم پر اساس او د شهیدانو او معلولینو چارو وزارت د وړاندیز له مخې، د دې وزارت د څارنې او ارزونې ریاست د نوي رئیس په توګه اړوند کارکوونکو ته په رسمي ډول معرفي او خپلې چارې پيل کړې.
د معرفي په پروګرام کې د کارکوونکو چارو رئیس محترم مولوي محمد موسی صدیقي، د شهیدانو چارو رئیس محترم مولوي روح الله نصرت، د پلان او بهرنیو اړیکو رئيس محترم ملا صدوخان حق شناس، د اداري خدماتو رئیس محترم مولوي سردار محمد حبیب، د لغمان ولایت د شهیدانو او معلولینو چارو رئیس محترم حاجي فیض الله جواد، همداراز یو شمېر آمرینو، راغلو مېلمنو او د یاد ریاست اړوند کارکوونکو حضور درلود.
د کارکوونکو چارو رئیس محترم مولوي محمد موسی صدیقي په خپلو خبرو کې د څارنې او ارزونې ریاست رول یې د هرې ادارې د موخو د تحقق لپاره مهم او کلیدي وباله، د محترم مولوي نورالحق حقاني له هڅو او خدمتونو څخه، چې تر دې وړاندې یې د څارنې او ارزونې ریاست د رئیس په توګه دنده ترسره کوله، مننه او قدرداني وکړه.
محترم مولوي محمد موسی صدیقي پر یو شمېر مهمو اداري موضوعاتو باندې هم خبرې وکړې، د کارکوونکو ترمنځ د همغږۍ رامنځته کول، د اداري سلسلې مراتبو مراعاتول، د موجوده منابعو څخه غوره ګټه اخیستنه، د پلان او د دندو لایحو پر اساس د سپارل شویو مسؤلیتونو ترسره کول یې د ادارو د بریا او پرمختګ بنسټیز اصول وګڼل.
په دې پروګرام کې د شهیدانو چارو رئیس محترم مولوي روح الله نصرت د محترم محمد صابر ځواک هغه ارزښتناکې کړنې او فعالیتونه وستایل، چې د ننګرهار ولایت د شهیدانو او معلولینو چارو د رئیس په توګه یې ترسره کړي وو. نوموړي یتیمانو، کونډو مېرمنو او معلولینو ته د مؤثرو خدمتونو د وړاندې کولو په برخه کې د دوامداره څارنې او ارزونې بهیر خورا مهم وباله، نوي رئیس ته یې په ورسپارل شوو دندو کې د بریا او د لا ډېر خدمت کولو هیله څرګنده کړه.
د یادونې وړ ده چې محترم محمد صابر ځواک له دې وړاندې د ننګرهار ولایت د شهیدانو او معلولینو چارو رئیس په توګه دنده ترسره کوله، او د خپلې دندې پر مهال یې د بشپړې ژمنتیا، اخلاص او صداقت سره د دې ولایت اړمنو قشرونو، په ځانګړي ډول یتیمانو، کونډو مېرمنو او معلولینو ته ارزښتناک او دوامداره خدمتونه وړاندې کړي دي.
