د شهیدانو او معلولینو چارو وزیر محترم الحاج ملا عبدالمجید آخند د (HHRD) نړیوالې مؤسسې د مسؤلینو هڅې وستایلې
د شهیدانو او معلولینو چارو وزیر محترم الحاج ملا عبدالمجید آخند د (HHRD) نړیوالې مؤسسې رئیس محترم قاري عبیدالله فیصل او د یادې مؤسسې مرستیال محترم همایون نوري ته، د یتیمانو، کونډو او معلولیت لرونکو وګړو لپاره د غوره خدمتونو وړاندې کولو، د شهیدانو او معلولینو چارو وزارت سره د اغېزمنې همغږۍ او د دوامدارې همکارۍ په پار ستاینلیکونه ورکړل.
په همدې موخه جوړه شوې غونډه کې د مقام د دفتر رئیس محترم مولوي شاه محمد دوست، د پلان، بهرنیو اړیکو او د تقنین چارو رئیس محترم مولوي ثناء الله فرقاني، د مالي او حسابي چارو رئیس محترم مولوي محمد امین دروېش او د خدماتو، ساتنې او پاملرنې رئیس محترم مولوي سردار محمد حبیب هم حضور درلود.
محترم وزیر صاحب، یتیمانو، کونډو او معلولیت لرونکو وګړو ته د ښو خدمتونو وړاندې کولو په برخه کې د یادې مؤسسې هڅې وستایلې او د وزارت سره یې له دوامدارې همکارۍ مننه وکړه او په راتلونکو چارو کې یې ورته د لا زیاتو بریاوو هیله څرګنده کړه.
د یادونې وړ ده چې د (HHRD) نړیوالې مؤسسې د شهیدانو او معلولینو چارو وزارت سره په بشپړې همغږۍ د هېواد په مرکز او ولایتونو کې زرګونو تنو یتیمانو، کونډو او معلولیت لرونکو وګړو ته د فني او حرفوي زده کړو، د یتیمانو د کفالت، روغتیايي خدمتونو او همدارنګه د خوراکي او غیرخوراکي توکو د وېش په برخو کې پراخې او اغېزمنې مرستې ترسره کړې دي.
