د تخار ولایت د شهیدانو او معلولینو چارو په ریاست کې اداري غونډه ترسره شوه
د تخار ولایت د شهیدانو او معلولینو چارو رئیس محترم مولوي عبدالغفار غفوري په مشرۍ په یاد ریاست کې د چارو د ښه سمون او یتیمانو، کونډو او معلولینو ته د ښو خدمتونو وړاندې کولو په موخه اداري غونډه ترسره شوه، چې په هغه کې د شهيدانو او معلولينو چارو آمر محترم مولوي رحمت الله حقبین، د ولسوالېو مدیرانو او اړوند ټولو کارکوونکو ګډون کړی وو.
په دې غونډه کې محترم مولوي عبدالغفار غفوري د ۱۴۰۴ مالي کال لپاره د ریاست په موخو، پلانونو، د شهيدانو او معلولينو چارو وزارت د منظور شوې طرحې سره سم د یتیمانو، کونډو او معلولینو د تثبیت او ثبت بهیر او همداراز هغوی ته د غوره او پر وخت خدمتونو د وړاندې کولو په هکله خبرې وکړې.
هغه همداراز د یاد ریاست له کارکوونکو وغوښتل چې خپلې ورسپارل شوې دندې یو الهي امانت وګڼي او له هر ډول غفلت او بې پروايۍ څخه دې په کلکه ډډه وکړي.
نوموړي د دې غونډې په ترڅ کې، د ګډونوالو نظرونه او غوښتنې هم واوریدې او ډاډ یې ورکړ چې د امکان په صورت کې به ورته پوره رسېدګي وشي.
