د شهیدانو او معلولینو چارو وزارت او د ماشومانو د ملاتړ نړیوالې مؤسسې ترمنځ د هوکړه لیک لاسلیک
د شهیدانو او معلولینو چارو وزارت د معلولیت لرونکو وګړو د اقتصادي ځان بسیاینې په موخه د (۲۹۱) زره او (۲۰۸) امریکایي ډالرو په مجموعي ارزښت د ماشومانو د ملاتړ نړیوالې مؤسسې سره هوکړه لیک لاسلیک کړ.
یاد هوکړه لیک چې د دې وزارت د بهرنيو اړیکو او پلان رئیس محترم ملا صدوخان حق شناس او د ماشومانو نړېوالې مؤسسې عمومي مشر محترم ارشد محمود ملک تر منځ لاسلیک شو، له مخې به یې په جوزجان ولایت کې (۱۰۵۶) هغو کورنیو ته چې معلولیت لرونکي ماشومان لري، د اقتصادي ځان بسیاینې په موخه د خیاطۍ او ګلدوزۍ اړین وسایل او خام مواد چمتو او ووېشل شي. همداراز، د معلولیت لرونکو ماشومانو لپاره به روزنیز او مهارتي پروګرامونه په لاره واچول شي. د دې سربېره، یادو کورنیو ته د غیر خوراکي توکو مرستې او نور اړین خدمتونه به هم وړاندې شي.
د یادونې وړ ده چې د یادې پروژې د تطبیق چارې به د یو کال په موده کې د جوزجان ولایت د شهیدانو او معلولینو چارو ریاست په همغږۍ پر مخ یوړل شي.
