د شهیدانو او معلولینو چارو وزارت سرپرست وزیر د افغان آسیا هلال خیریه مؤسسې له مشر سره وکتل.
د شهیدانو او معلولینو چارو وزارت سرپرست وزیر ښاغلي ملا عبدالمجید آخند د افغان آسیا هلال خیریه مؤسسې له مشر ښاغلي اوغور سره په خپل کاري دفتر کې وکتل. په دې کتنه کې د شهیدانو او معلولینو چارو وزارت مالي او اداري چارو عمومي رئیس ښاغلي مولوي کلیم الله افغان، د یاد وزارت د دفتر رئیس ښاغلي قاري شاه محمد دوست، د بشري سرچینو رئیس ښاغلي مولوي محمد موسی صدیقي، د یتیمانو او معلولینو پالنې مرکز رئیس ښاغلي مولوي صدو خان او د یاد وزارت د اطلاعاتو او عامه اړیکو مسؤل ښاغلي مفتي فیصل خاموش هم ګډون درلود.
په پیل کې د افغان آسیا هلال خیریه مؤسسې مسؤلینو د یتیمانو او معلولینو لپاره د حرفوي زده کړو د مرکز د جوړولو په اړه هر اړخیز معلومات وړاندې کړل او زیاته یې کړه: د یاد شوي حرفوي زده کړو مرکز له جوړېدو څخه موخه یتیمانو او معلولینو ته د دیني، عصری او حرفوي زده کړو د زمینې برابرول او همداراز د یتیمانو ساتنه او پالنه ده.
په دې کتنه کې د شهیدانو او معلولینو چارو وزارت سرپرست وزیر ښاغلي ملا عبدالمجید آخند د یتیمانو او معلولینو لپاره د حرفوي زده کړو د مرکز د جوړولو په اهمیت خبرې وکړې او زیاته یې کړه: د یتیمانو او معلولیت لرونکو وګړو لپاره د حرفوي زده کړو د مرکز جوړول د خدمت کولو یو ښه ګام دی او د شهیدانو او معلولینو چارو وزارت په دې برخه کې هر اړخیزې همکارۍ ته ژمن دی.
همدارنګه په دې کتنه کې د شهیدانو او معلولینو چارو وزارت مالي او اداري چارو عمومي رئیس ښاغلي مولوي کلیم الله افغان د حرفوي زده کړو د مرکز د جوړولو د څرنګوالي په اړه خبرې وکړې او زیاته یې کړه: د حرفوي زده کړو د مرکز په جوړېدو سره به ډیری یتیمان او معلولین وکولای شي د حرفوي زده کړو له زده کړې وروسته د خپلو کورنیو اقتصادي ستونزې هوارې او د هغوی لاسنیوی وکړي.
نوموړي همداراز زیاته کړه: د شهیدانو او معلولینو چارو وزارت تر رهبرۍ لاندې به د حرفوي زده کړو د مرکز د جوړولو ځای، د روزنې څرنګوالي او مدیریت په موخه یوه کمېټه جوړه شي، تر څو د یاد حرفوي مرکز چارې په سمه توګه ترسره شي.
همدارنګه په دې کتنه کې د شهیدانو او معلولینو چارو وزارت د دفتر رئیس ښاغلي قاري شاه محمد دوست هم خبرې وکړې او ویې ویل، یاد شوي حرفوي زده کړو مرکز باید د مالي امکاناتو له مخې په سمه توګه تمویل شي، تر څو یتیمانو او معلولینو ته په ښه توګه د حرفوي زده کړو زمینه برابره او له زده کړو وروسته ددې وړتیا پیدا کړي چې د خپلې کورنۍ اقتصادي ستونزې هوارې کړای شي.
د یادونې وړ ده چې په یاد شوي حرفوي زده کړو مرکز کې به (۴۰۰ ) تنه یتیمان او معلولین د حرفوي زده کړو تر څنګ دیني او عصري زده کړې هم وکړي.
