د شهیدانو او معلولینو چارو وزارت او د بېړنیو حالاتو پر وخت د روغتیايي خدمتونو وړاندې کوونکې (HHERO) مؤسسې ترمنځ هوکړه لیک لاسلیک شو
د شهیدانو او معلولینو چارو وزارت د یتیمانو او کونډو د اقتصادي ځانبسیاینې په موخه، د بېړنیو حالاتو پر وخت د روغتیايي خدمتونو وړاندې کوونکې (HHERO) مؤسسې سره د (۱۸۲) زره او (۹۷۰) ډالرو په ارزښت هوکړه لیک لاسلیک کړ چې له مخې به یې د کندهار ولایت په سپین بولدک ولسوالۍ کې د یتیمانو (۱۵۰) کورنیو ته په بېلابېلو برخو کې مسلکي او حرفوي زدهکړې ورکړل شي. د پروګرام په پای کې به د کار د پیل په موخه اړین وسایل هم له دوی سره مرسته وشي، څو هغوی وکولای شي د دغو امکاناتو په کارولو سره اقتصادي ځانبسیاینې ته ورسېږي.
یاد هوکړه لیک د شهیدانو او معلولینو چارو وزارت د پلان، بهرنیو اړیکو او تقنین چارو رئیس محترم مولوي ثناءالله فرقاني او د یادې مؤسسې رئیس محترم محمد قسیم توخي ترمنځ لاسلیک شو.
محترم مولوي ثناء الله فرقاني د یتیمانو، کونډو او معلولیت لرونکو وګړو اړتیاوو او ستونزو ته په اشارې سره وویل، د ټولنې دې باعزته قشر ته خدمت کول او د هغوی ستونزو ته پر وخت او اغېزمنه رسېدنه د ټولو ګډ انساني مسؤلیت دی، له ټولو خیریه بنسټونو او مؤسسو یې وغوښتل، چې د شهیدانو او معلولینو چارو وزارت سره په نږدې همغږۍ د یتیمانو، کونډو او معلولیت لرونکو وګړو لپاره د اقتصادي ځانبسیاینې، ښوونیزو او مسلکي پروګرامونو او نورو ټولنیزو خدمتونو په برخو کې خپلې همکارۍ لا پراخې کړي.
په ورته وخت کې د یادې خیریه مؤسسې مسؤل د شهیدانو او معلولینو چارو وزارت له لوري یتیمانو، کونډو او معلولیت لرونکو وګړو ته د خدمتونو د وړاندې کولو په برخه کې ترسره شوې هڅې وستایلې او ژمنه یې وکړه، چې یاده مؤسسه به د یتیمانو د اقتصادي ځانبسیاینې، زدهکړو، مسلکي مهارتونو او نورو اړوندو برخو کې له وزارت سره خپلې هر اړخیزې همکارۍ ته دوام ورکړي.
ټاکل شوې ده چې دغه پروژه به د کندهار ولایت د شهیدانو او معلولینو چارو ریاست په همغږۍ، د یوه کال په موده کې پلې شي.
