د شهیدانو او معلولینو چارو وزارت او د (SCAWNO) مؤسسې ترمنځ د څه باندې (۹) لکه ډالرو په ارزښت هوکړه لیک لاسلیک شو
د شهیدانو او معلولینو چارو وزارت د یتیمانو او معلولیت لرونکو وګړو د اقتصادي ځان بسیاینې په موخه، د افغان ماشومانو او ښځو د ملاتړ او د اړتیاوو د پوره کولو (SCAWNO) مؤسسې سره د (۹) لکه او (۴۰۹۲) ډالرو په ارزښت د همکارۍ هوکړه لیک لاسلیک کړ.
د دې هوکړه لیک پر اساس به، په بغلان او کنړ ولایتونو کې د شهیدانو او معلولینو له کورنیو څخه (۲۵۹۵) تنو مستحقینو ته د خیاطۍ، ګلدوزۍ، د لبنیاتو تولید او پروسس، د سبزیجاتو د کرنې، د موبایل ترمیم او نورو برخو کې مسلکي زده کړې ورکړل شي. همداراز یادو کسانو ته به د فراغت وروسته د کار د پيل کولو لپاره اړین وسایل او امکانات هم برابر شي.
د همکارۍ دغه هوکړه لیک د بهرنیو اړیکو، پلان او تقنین چارو رئيس محترم مولوي ثناء الله فرقاني او د یادې مؤسسې رئيس محترم عبدالاحد زاهد ترمنځ لاسلیک شو، د کنړ او بغلان ولایتونو د شهیدانو او معلولینو چارو ریاستونو سره په همغږۍ به د (۱۰) میاشتو په موده کې تطبیق شي.
د هوکړه لیک د لاسلیک پر مهال محترم مولوي ثناء الله فرقاني د یادې خیریه مؤسسې له مسؤل سره یې د یتیمانو، کونډو او معلولینو اړتیاوې شریکې کړې او د یاد قشر لپاره یې د لازیاتو مرستو غوښتنه وکړ.
