د شهیدانو او معلولینو چارو وزارت د کړنو او فعالیتونو د پلټنې او ارزونې ځانګړي پلاوي د بشري سرچینو ریاست څخه هر اړخیزه ارزونه وکړه
د شهیدانو او معلولینو چارو وزارت د ځانګړي پلاوي د ارزونې او پلټنې په لړ کې د بشري سرچینو ریاست د کړنو او فعالیتونو ارزونه او پلټنه ترسره شوه، په دې ارزونه کې د یاد ریاست ټولې اړوندې څانګې (اجرائیه مدیریت، د ظرفیت لوړونې او اداري پراختیا آمریت، د استخدام آمریت، د سوانح آمریت او همداراز د کارکوونکو د حاضري برخې څخه د ځانګړي پلاوي لخوا هر اړخیزه پلټنه او ارزونه ترسره شوه.
همداراز د بشري سرچینو ریاست د ارزونې په ترڅ کې د شهیدانو او معلولینو چارو وزارت مشاور ښاغلي مولوي حیات الله میوند د یاد ریاست له کارکوونکو څخه وغوښتل تر څو خپلې ورځنۍ چارې په رښتینولۍ او اخلاص سره ترسره کړي.
د بشري سرچینو رئیس ښاغلي مولوي محمد موسی صدیقي هم د اړوند ریاست کارکوونکي د ځانګړي پلاوي د ارزونې د موخې په اړه کارکوونکو ته معلومات ورکړل او د کارکوونکو د کړنو او فعالیتونو ارزونه یې د کاري چارو په ترسره کولو کې اړینه وبلله او له هغوې څخه یې وغوښتل تر څو د چارو په ترسره کولو کې له بشپړ امانت او اخلاص څخه کار واخلي.
د یادونې وړ ده د دې اوونۍ په لړ کې د شهیدانو او معلولینو چارو وزارت د ځانګړي پلاوي د ارزونې او پلټنې په ترڅ کې د تخنیکي او مسلکي چارو معینیت، د شهیدانو او معلولینو چارو معینیت او همداراز د مالي او اداري چارو عمومي ریاست د اجرائیه مدیریتونو او د څارنې او ارزونې ریاست ټولې اړوندې کړنې او فعالیتونه په هر اړخیزه توګه د یاد پلاوي لخوا وارزول شول.
د ارزونې په دې لړۍ که به د ریاستونو د کړنو او فعالیتونو د څرنګوالي، کاري پلانونو د تطبیق، د وزارت د کارکوونکو اجراآت، د کارکوونکو د مسلکي مهارتونو وړتیا، او همداراز یتیمانو او معلولیت لرونکو وګړو ته د ښو او غوره خدمتونو وړاندې کولو څرنګوالی به وڅیړل شي.
د ارزونې د هیئت په ترکیب کې د بشري سرچینو رئیس ښاغلې مولوي محمد موسی صدیقي او د څارنې او ارزونې ریاست غړی ښاغلې مولوي خیرالله خیرخواه شامل دي، چې مشري یې د شهیدانو او معلولینو چارو وزارت مشاور ښاغلی مولوي حیات الله میوند کوي، دوې به د اړوندو ریاستونو هر اړخیزه ارزونه کوي او د خپلو اجراآتو او څیړنو راپور به د وزارت مشرتابه سره شریک کوي.
