د شهیدانو او معلولینو چارو سرپرست وزیر پوهنمل حمیدالله فاروقي د جمهور رییس دویم مرستیال سره وکتل
د شهیدانو او معلولینو چارو سرپرست وزیر پوهنمل حمیدالله فاروقي د جمهور رییس دویم مرستیال سره وکتل
د ناستې په پیل کې ښاغلي فاروقي د شهیدانو ورثې او معلولیت لرونکو وګړو ته د ځانګړې پاملرنې او د یوه خپلواک بودجوي واحد په توګه د وزارت د ارتقاء په اړه د جلالتمآب استاد سرور دانش له همکاریو مننه وکړه ویې ویل: جلالتمآب جمهور رییس او ستاسې د ځانګړی پاملرنې له امله نن د شهیدانو ورثه او معلولیت لرونکي وګړي د یوې خپلواکې ادارې خاوندان دي. هیله ده راتلوونکي کې هم د دې قشر د ملاتړ په موخه یادې ادارې سره همکاري وکړي.
ښاغلي فاروقي په مرکز او ولایتونو کې د شهیدانو د ورثې او معلولینو د اسنادو او وثیقو د څېړنې او ارزونې په اړه وویل: په مرکز او ولایتونو کې ۶۰ سلنه اسنادونه څېړل شوي او ځیني غیر قانوني اسناد تثبیت او رد شوي دي. پر دې سربېره د فساد مخنیوي او د خدمتونو د چټکتیا په موخه د برېښنایي سیستم تطبیق اړین وګڼ او په دې اړه یې د الیکترونیکي تذکرو اخیستل او د سیستم د تطبیق لپاره خپل پلانونه روښانه کړه.
ښاغلي فاروقي زیاته کړه، چې د معلولینو د لس کلنې ملي ستراتیژي مسوده نهايي او د تطبیق لپاره يې د عمل جوړ شوی، چې د جلالتمآب جمهور رییس له تایید وروسته به پلي شي. ښاغلي فاروقي وویل، د شهیدانو د وارثینو ، معلولینو او نادرکه شویو د حقوقو او امتیازاتو قانون د تعدیل طرحه د وزارت د حقوقي متخصصینو لخوا نهايي او د عدليي محترم وزارت ته لېږل شوې چې وروسته به د کابینې د تقنین فرعي کمیټې ته راجع او د قانون له تعدیل سره د معلولینو تر منځ تفکیک ختم شي. ښاغلي فاروقي یاد قشر ته د تحصیلي بورسیو ورکړه، کارموندنه، ظرفیت لوړونه او په ټولنه کې ادغام له اساسي پلانونو وباله او له نړیوالو مرستندویه بنسټونو سره يې په دې اړه د لیدنو راپور شریک کړ.
د جمهور رییس دویم مرستیال جلالتمآب استاد سرور دانش ښاغلي فاروقي او د وزارت مشرتابه پلاوي ته ښه راغلاست ووایه، د ښاغلي فاروقي ګمارنه يې نیک او پرځای ګام وباله وویل، چې د داسې علمي کادر په راتګ سره به دا اداره د شهیدانو وارثینو او معلولیت لرونکو وګړو ستونزو ته پر وخت رسیدګي وکړي. جلالتمآب استاد سرور دانش زیاته کړه، د تېرو څو لسیزو جګړو له امله زموږ هېوادوال شهیدان او معلول شوي دي، دې خلکو د هیواد ساتنې په موخه د خپلې کورنۍ او بدن خواږه غړي له لاسه ورکړي دي، اړتیا ده چې دوي ته سمه رسیدګي وشي او ستونزې یې پر وخت حل شي. جلالتمآب استاد سرور دانش د حقوقو ورکړه کې روڼتیا، د اسنادو څېړنې په پروسه کې چټکتیا او د برقي سیستمونو تطبیق يواځینۍ حل لاره وبلله او په دې اړه یې د وزارت وروستۍ کړنې وستایلې وویل: په وزارت کې د روڼتیا د رامنځته کولو په موخه ډیر کار شوی خو لا هم ځینو ولایتونو کې اساسي اصلاحاتو ته اړتیا لیدل کېږي.
جلالتمآب استاد سرور دانش په ټولو ادارو کې د شهیدانو او معلولینو د حقوقو او امتیازاتو د قانون تطبیق، د ادارو تر منځ همغږۍ او خدمتونو وړاندې کولو کې د برېښنایي سیستمونو څخه ګټه اخیستنه اړین وباله او په دې برخه کې يې د هر راز همکاریو ژمنه وکړه.
