د شهیدانو او معلولینو چارو وزارت او د افغان پراختیا مؤسسې ترمنځ د څه باندې (۱۰) میلیونه افغانیو په ارزښت هوکړه لیک لاسلیک شو
د شهیدانو او معلولینو چارو وزارت د معلولیت لرونکو وګړو د اقتصادي ځان بسیاینې په موخه، د افغان پراختیا (ADA) مؤسسې سره د (۱۰) میلیونه، (۹۶۳) زره او (۵۳۳) افغانیو په ارزښت د همکارۍ هوکړه لیک لاسلیک کړ، د دې پروژې له مخې، د کندز، تخار، بدخشان او بغلان ولایتونو کې (۱۷۴) تنو معلولیت لرونکو وګړو ته حرفوي زده کړې ورکول کېږي، دغه زده کړې به د خیاطۍ، نجارۍ، د موبایل ترمیم، د موټر او موټرسایکل ترمیم په برخو کې ورکړل شي، سربېره پر دې، هر ګډونوال ته (۲۵۰۰) افغانۍ نغدي مرستې هم د ترانسپورټ او د غرمې ډوډۍ د لګښت لپاره ورکول کېږي. همدارنګه، د (۱۵۰۰) تنو لپاره د معلولیت لرونکو کسانو د حقونو او په ټولنه کې د هغوی د ملاتړ په اړه د عامه پوهاوي غونډې د کندز، بغلان، تخار او بدخشان ولایتونو په ولسوالیو کې ترسره کېږي. د همکارۍ دغه هوکړه لیک د بهرنیو اړیکو، پلان او تقنین چارو ریاست او د افغان پراختیا مؤسسې ترمنځ لاسلیک شو، چې د یادو ولایتونو د شهیدانو او معلولینو چارو ریاستونو سره په همغږۍ به د (۷) میاشتو په موده کې تطبیق شي.
