د شهیدانو او معلولینو چارو وزارت د کارکوونکو د چارو په ریاست کې اداري غونډه ترسره شوه
د کاري بهیر د لا ښه والي په موخه د کارکوونکو چارو رئیس محترم مولوي محمد موسی صدیقي په مشرۍ په یاد ریاست کې اداري غونډه ترسره شوه، چې په کې د ریاست اړوند آمرینو او کارکوونکو ګډون کړی وو.
په دې غونډه کې محترم مولوي محمد موسی صدیقي د کارکوونکو د کاري ظرفیتونو د لوړولو پروګرام چې عملاً په کې (۶۴) تنه کارکوونکي د مدیریت پیژندنې، اداري مراسلاتو، راپور لیکنې، مالي مدیریت، پروپوزل لیکنې او د څارنې او ارزونې په برخو کې په زده کړو بوخت دي، د تطبیق څخه د ډاډ ترلاسه کولو په موخه لازمې لارښوونې وکړې، همداراز د عالیقدر امیرالمؤمنین حفظه الله تعالی د احکامو، فرامینو د تعقیب او نظارت لوی رياست او د تفتیش عالي ادارې د سپارښتنو د تطبیق او ځواب، د ۱۴۰۵ مالي کال لپاره د شهیدانو او معلولینو چارو وزارت د تشکیلاتو راتلونکې عمومي دفاعیې لپاره د چمتوالي او د ښوونیز پروګرام ګډونوالو ته د تصدیق پاڼو د وېش په اړه هم لازمې سپارښتنې وکړې.
په دې غونډې کې ګډونوالو خپل نظرونه او وړاندیزونه وړاندې کړل او د يادو چارو د ښه ترسره کولو په موخه هغوی ته د محترم مولوي محمد موسی صدیقي له لوري لازمې لارښوونې وشوې.
