د شهیدانو او معلولینو چارو وزارت د پلان او همغږۍ پخواني رئیس مرحوم سید محمد عظیم آغا د فاتحې مراسم ترسره شول.
د شهیدانو او معلولینو چارو وزارت د پلان او همغږۍ رئیس مرحوم سید محمد عظیم آغا چې د تیرې جمعې په ورځ د کاپيسا ولایت د صیادو په سیند کې د ډوبیدو په پیښه کې په حق ورسید، د فاتحې مراسم یې نن د شهیدانو او معلولینو چارو په وزارت کې ترسره شول.
په هغه مراسمو کې چې په همدې موخه د شهیدانو او معلولینو چارو په وزارت کې جوړ شوي وو، په هغه کې د شهیدانو او معلولینو چارو مرستیال ښاغلي شیخ صاحب عبدالحکیم حقاني، د دعوت او ارشاد رئیس ښاغلي مفتي عبدالاحد مسعود، د اداري خدمتونو رئیس ښاغلي ملا عبدالرحمن فهیم، د ټولنيزو چارو خدمتونو رئيس ښاغلي مولوي ثناء الله فرقاني، د معلولينو چارو رئيس ښاغلي مولوي عبدالنافع منتفع، د ډيټابيس او معلوماتو رئيس ښاغلي ملا رحمت الله خالد او د دغه وزارت اړوند کارکوونکو ګډون کړی وو.
په یادو مراسمو کې د شهیدانو او معلولینو چارو مرستیال ښاغلي شیخ صاحب عبدالحکیم حقاني د مرحوم سید محمد عظیم آغا د شخصیت او کارنامو په اړه خبرې وکړې او زیاته یې کړه: مرحوم سید محمد عظیم آغا کلونه د اسلامي امارت په نظامي او ملکي برخو کې ستر خدمتونه کړي وو او د شهادت تر وروستیو پورې یتیمانو، کونډو او معلولینو ته د خدمتونو په وړاندې کولو بوخت وو او په دې لاره کې یې زیاتې ستونزې او کړاوونه ګاللي وو.
همدارنګه نوموړي د مرحوم کورنۍ، دوستانو او خپلوانو ته د خپلې خواخوږۍ او ډاډګیرنې مراتب وړاندې کړل او د لوی خدای (جل جلاله) له دربار څخه یې مرحوم ته جنت فردوس او کورنۍ ته یې د جمیل صبرغوښتنه وکړه.
د دغه مراسمو په ترڅ کې محترم شیخ صاحب د شهیدانو او معلولینو چارو وزارت له کارکوونکو او مسؤلینو څخه وغوښتل چې ور سپارل شوي مسؤلیتونه دې په ښه توګه ادا کړي ځکه هر فرد به د خپلو اعمالو جوابګو وي.
همدارنګه د شهیدانو او معلولینو چارو وزارت د دعوت او ارشاد رئیس ښاغلي مفتي عبدالاحد مسعود د قرآن عظیم الشان او د رسول الله (صلی الله علیه وسلم) د احادیثو له نظره د شهادت او د شهید د مقام او منزلت په اړه هر اړخیز معلومات وړاندې کړل او زیاته یې کړه: د الله (جل جلاله ) په لاره کې شهیدان به د قیامت په ورځ لوړ مقام ولري، نوموړي همداراز د مرحوم کورنۍ ته خپل د خواخوږۍ او تسلیت مراتب وړاندې کړه.
د مراسمو په پای کې د مرحوم سید محمد عظیم آغا زوی ښاغلي سید تمیم آغا هم د خپل مرحوم پلار د شهادت د څرنګوالي په اړه خبرې وکړې او د اسلامي امارت او په ځانګړې توګه د شهیدانو او معلولینو چارو وزارت د رهبرۍ له شفقت او مهربانۍ څخه یې مننه وکړه چې دوی یې په دې ستر غم کې یوازې نه دې پریښودلي.
