د برېښنايي سيسټم پلې کیدو سره سم به د شهيدانو ورثې او معلولينو ځنډيدلي حقوق حواله شي
د برېښنايي سيسټم پلې کیدو سره سم به د شهيدانو ورثې او معلولينو ځنډيدلي حقوق حواله شي
د شهيدانو او معلولينو چارو سرپرست وزير پوهنمل حميدالله فاروقي د لوګر ولايت له معلولينو استازو سره وکتل او د هغوی ستونزې، غوښتنې، مشورې او وړانديزونه يې واوريدل.
د ناستې په پيل کې د لوګر ولايت د معلولينو شورا رئيس شامحمود حسين خېل د معلولينو په استازيتوب ښاغلي فاروقي ته د نوي مسووليت مبارکي ورکړه او په چارو کې يې ورته د برياوو او لاسته راوړنو هيله وکړه.
د ناستې ګډونوالو هر يوه په خپل وار له ښاغلي فاروقي سره، په لوګر ولايت کې د معلوليت لرونکو وګرو د معاشونو د ځنډ، سرپناه، زدکړو، کارموندنې، بانکي سازۍ، برېښنايي سیسټم، د برېښنايي تذکرو ويش او د نویو تثبیت معلولينو پروسې په برخو کې موجوده ستونزې شريکې کړي او د حل غوښتونکي شول.
د شهيدانو او معلولينو چارو سرپرست وزير پوهنمل حمدالله فاروقي، ددوی له راتګ او مبارکۍ څخه مننه وکړه، په راغلو کسانو کې يې د ښځو شتون مثبت ګام وګاڼه او د هغوی د فعاله ګډون ستاینه يې وکړه.
د ښاغلي فارقي په خبره، چې څلور لسیزې تحميلې جګړې د افغانانو لپاره له ويجاړۍ او تباهۍ پرته بل څه په ميراث نه دي پريښي او اوس هم هره ورځ د همدې ناوړه جګړې له امله د شهيدانو او معلولينو شمير مخ پر زياتېدو دی.
ښاغلي فاروقي د دوی ستونزو او غوښتنو په ځواب کې وويل، د شهيدانو او معلولينو چارو وزارت ژمن دی، چې له شته امکاناتو او سرچينو څخه په اعظمي ګټې اخيستنې سره د شهيدانو ورثې او معلوليت لرونکو وګړو ستونزو ته رسيدنه وکړي.
نوموړي څرګنده کړه، چې د برېښنايي سيسټم له پلې کیدو سره سم به د شهيدانو مستحقې ورثې او معلولينو ځنډيدلي حقوق حواله شي.
په پای کې د لوګر معلولينو استازو ښاغلي فاروقي ته د مبارکۍ ترڅنګ د عزت او درناوي په پار چپنه هم ډالۍ کړه.
