د شهیدانو او معلولینو چارو د سرپرست وزیر په مشرۍ د وزارت د رهبرۍ ناسته وشوه
د شهیدانو او معلولینو چارو د سرپرست وزیر په مشرۍ د وزارت د رهبرۍ ناسته وشوه
نن پنجشنبه د (سلواغې میاشتې ۹ نېټه) د شهیدانو او معلولینو چارو د سرپرست وزیر ښاغلي پوهنمل حمید الله فاروقي په مشرۍ د وزارت د رهبرۍ ناسته ترسره شوه، چې د وزارت مرستیالانو، رییسانو، مشاورینو او نورو مسولینو پکې ګډون درلود.
ښاغلي فاروقي د رهبرۍ د نننۍ ناستې اصلي موخه د وزارت د رهبرۍ غړو سره پېژندنه، پر شته ستونزو بحث، د حل لارو موندنه او اقداماتو ترسره کول وګڼل وویل: مهمه ده، چې د ټولو برخو تر منځ همغږي او همکاري نوره هم پیاوړې شي، تر څو چارې منظمې، چټکې او د شهیدانو ورثې او د معلولیت لرونکو وګړو ستونزو او غوښتنو ته په بېړني ډول رسېدنه وشي.
ښاغلي فاروقي زیاته کړه، چې د شهیدانو ورثه او معلولیت لرونکي وګړي د ټولنې زیانمن او مستحق قشر دی، دوی سره مرسته او همکاري د دې ادارې تر څنګ د ټولو دولتي او غیر دولتي بنسټونو او خلکو دیني، انساني او وجداني مسولیت دی، چې باید ښه توګه ترسره شي.
ښاغلي فاروقي په اداره کې د بیروکراسۍ په ختمولو، مراجعینو ته د اسانتیاوو په رامنځته کولو، شته ستونزو او ننکونو سره په مبارزه، د شهیدانو ورثې او معلولینو سره په نېک برخورد او درناوي ټینګار وکړ زیاته یې کړه، چې د شهیدانو ورثې او معلولینو ته د غوره خدمتونو وړاندې کول او د ستونزو ته یې رسېدنه لومړیتوب او په دې برخه کې ورته هیڅ ډول ځنډ او خنډ د منلو وړ نه دی.
د رهبرۍ غړو هم د خپلو برخو اړوند مسایل د وزارت مشرتابه سره شریک کړل، چې د بحث او حل په موخه د رهبرۍ د راتلوونکې ناستې په اجنډا کې شامل شوه.
