د شهیدانو او معلولینو چارو وزارت او د احساس د ټولنیزو خدمتونو مؤسسې ترمنځ د همکارۍ هوکړه لیک لاسلیک شو
د شهیدانو او معلولینو چارو وزارت د یتیمانو د ملاتړ او د هغوی لاسنیوي په موخه، د احساس د ټولنیزو خدمتونو مؤسسې سره د (۲) لکه، (۱۵) زره او (۲۵۰) ډالرو په ارزښت د همکارۍ هوکړه لاسلیک کړ، د دې هوکړه لیک له مخې به، په (۹۰۰) تنو مستحقو یتیمانو باندې په کابل، لوګر، پکتیا او پکتیکا ولایتونو کې نغدې مرستې ووېشل شي. دا مرستې به یتیمانو ته په دوو پړاوونو کې ورکړل شي او په هر پړاو کې به هر یتیم (۱۲۰) ډالر ترلاسه کړي.
د همکارۍ دغه هوکړه لیک د شهیدانو او معلولینو چارو وزارت د بهرنیو اړیکو، پلان او تقنین چارو رئيس محترم مولوي ثناء الله فرقاني او د احساس د ټولنیزو خدمتونو مؤسسې مرستیال محترم روح الله صاحبزاده ترمنځ لاسلیک شو، چې پروژه به یې د یوه کال په موده کې د یادو ولایتونو د شهیدانو او معلولینو چارو ریاستونو سره په همغږۍ تطبیق شي.
محترم مولوي ثناء الله فرقاني د یادې مؤسسې له مرستو مننه وکړه، د مؤسسې له مسؤل سره یې د یتیمانو، کونډو او معلولیت وګړو ستونزې او غوښتنې شریکې کړې او یادونه یې وکړه چې په افغانستان کې ګڼ شمېر یتیمان، کونډې او معلولین شتون لري او د هغوی لاسنیوی او ملاتړ زموږ ګډه مسؤلیت دی.
