د شهیدانو او معلولینو چارو وزارت او افغانستان د سره بشري همکارۍ (HHOA) مؤسسې ترمنځ هوکړه لیکونه لاسلیک شول

د شهیدانو او معلولینو چارو وزارت د یتیمانو او معلولیت لرونکو وګړو د اقتصادي ځان بسیاینې په موخه، افغانستان  سره د بشري همکارۍ (HHOA) مؤسسې سره د (۷) لکه، (۹۵) زره او (۶۲۱) ډالرو په ارزښت د همکارۍ هوکړه لیکونه لاسلیک کړل.

د دې هوکړه لیکونو پر اساس به، په بلخ او لوګر ولایتونو کې د شهیدانو او معلولینو له کورنیو څخه (۲۱۰۰) تنو مستحقینو ته د خیاطۍ، ګلدوزۍ، د لبنیاتو تولید او پروسس، د سبزیجاتو د کرنې په برخو کې مسلکي زده کړې ورکړل شي. همداراز یادو کسانو ته به د فراغت وروسته د کار د پيل کولو لپاره اړین وسایل او امکانات هم برابر شي.

د همکارۍ دغه هوکړه لیکونه د بهرنیو اړیکو، پلان او تقنین چارو رئيس محترم مولوي ثناء الله فرقاني او د یادې مؤسسې استازي محترم عبدالعزیز آخند زاده ترمنځ لاسلیک شول، د لوګر او بلخ ولایتونو د شهیدانو او معلولینو چارو ریاستونو سره په همغږۍ به د (۱۰) میاشتو په موده کې تطبیق شي.

محترم مولوي ثناءالله فرقاني د یادې خیریه مؤسسې له مسؤلینو څخه مننه وکړه، د یتیمانو، کونډو او معلولیت لرونکو وګړو ستونزې او اړتیاوې ورسره شریکې کړې او ټینګار یې وکړ چې د شهیدانو کورنیو او معلولینو لاسنیوی او ملاتړ د ټولنې د هر وګړي ګډه انساني او اخلاقي دنده ده او ټول باید د خپل وس او توان په اندازه د دغو اړمنو قشرونو ملاتړ وکړي او د هغوی لپاره اسانتیاوې برابرې کړي.