د شهیدانو او معلولینو چارو وزارت د ژمي موسم په رارسیدو سره یو شمېر یتیمانو، کونډو او معلولینو ته د سوند توکو د چمتو کولو په موخه د (ZFA) خیریه مؤسسې سره د همکارۍ هوکړه لیک لاسلیک کړ

د یاد هوکړه لیک پر اساس به د کابل ولایت اړوند د پغمان، فرزې او استالف ولسوالېو (۳۴۶) تنو مستحقو یتیمانو، کونډو او معلولیت لرونکو وګړو ته د سوند توکي او کمپلۍ ووېشل شي په دې ترتیب به هر مستحق (۴۲۰) کیلوګرامه د سوند لرګي (۲۱۰) کیلو ګرامه د ډبرو سکاره او کمپلۍ ترلاسه کړي.

د همکارۍ دغه هوکړه لیک د شهیدانو او معلولینو چارو وزارت د بهرنېو اړیکو او پلان رئیس محترم ملا صدو خان حق شناس او د (ZFA) خیریه مؤسسې رئیس محترم ډاکټر حمیدالدین یولداش ترمنځ لاسلیک شو.

د یاد هوکړه لیک د لاسلیک پر مهال محترم ملا صدو خان حق شناس د یادې خیریه مؤسسې له مرستو څخه یې مننه وکړه او زیاته یې کړه: د شهیدانو او معلولینو چارو وزارت په هېواد کې یواځینی وزارت دی چې یتیمانو، کونډو او معلولینو ته په بېلابېلو برخو کې خدمتونه وړاندې کوي او د یادې مؤسسې له مشر څخه یې وغوښتل تر څو خپلې مرستې له دې وزارت سره په همغږۍ ترسره کړي او په دې ترتیب سره به مرستې واقعي مستحقینو ته ورسیږي.