د شهیدانو او معلولینو چارو وزارت با صلاحیته پلاوي په کندهار او هلمند ولایتونو کې د یاد وزارت د اړوند ریاستونو له کاري بهیر څخه لیدنه وکړه
د شهیدانو او معلولینو چارو وزارت باصلاحیته پلاوی چې مشري یې د شهیدانو او معلولینو چارو وزارت مرستیال ښاغلی شیخ صاحب عبدالحکیم حقاني کوي او په ترکیب کې د نوموړي وزارت د دفتر رئیس ښاغلی قاري شاه محمد دوست، د داخلي تفتيش رئيس ښاغلی مولوي احسان الله حقاني، د معلولینو چارو رئیس ښاغلی مولوي عبدالنافع منتفع او د پلانونو د تطبیق او ارزونې آمر ښاغلی قاري سید اسحاق سعید شامل دي، په کندهار او هلمند ولايتونو کې د شهيدانو او معلولينو چارو رياستونو د کاري بهیر څخه لیدنه وکړه.
ولایتونو ته د شهیدانو او معلولینو چارو وزارت مرستیال د سفر اصلي موخه د یاد وزارت په اړوند ریاستونو کې د شته خنډونو او ننګونو لرې کول بلل شوې ده.
د شهیدانو او معلولینو چارو وزارت مرستیال په اداري برخو کې د پرتو ستونزو د حل په موخه او همدارنګه د شهیدانو وارثینو او معلولینو سره د اسلامي امارت له اصولو او مقرراتو مطابق غوره چلند په برخه کې اړوند ریاستونو مسؤلینو او کارکوونکو ته لازمې لارښوونې وکړې.
همدارنګه نوموړي د یاد ریاستونو کارکوونکو او مسؤلینو ته هدایت ورکړ تر څو یتیمانو او معلولیت لرونکو وګړو ته پر وخت او په شفاف ډول د حقوقو او امتیازاتو په رسولو کې له هیڅ راز هلو ځلو ډډه ونه کړي.
د یادې لیدنې په ترڅ کې د شهیدانو او معلولینو چارو وزارت باصلاحیته پلاوي د يادو ریاستونو مسؤلينو او کارکوونکو ته د غوره خدمتونو د څرنګوالي په هکله يو لړ اغېزمنې او لازمې لارښوونې هم وړاندې کړې.
