په کاپیسا ولایت کې د مسلکي او حرفوي زده کړو د ښوونکو لپاره جوړ شوی ښوونیز ورکشاپ پای ته ورسید
د کاپیسا ولایت د شهیدانو او معلولینو چارو ریاست د افغان ځوانانو لپاره د تعلیمی او صحي مؤسسې سره په همغږۍ د شهیدانو کورنیو او معلولیت لرونکو وګړو لپاره د فني او حرفوي زده کړو د ښوونې په موخه، د (۶۱) تنو استادانو لپاره جوړ شوی ښوونیز ورکشاپ په بریالیتوب سره پای ته ورساوه.
ټاکل شوې ده چې یاد استادان به له دې وروسته په خپلو اړوندو سیمو کې د (۹۰۵) تنو مستحقو کسانو لپاره د خیاطۍ، د لبنیاتو د تولید، د موبایل ترمیم، برېښنايي وسایلو د ترمیم او غالۍ اوبدلو په برخو کې مسلکي زده کړې ورکړي. دغه روزنیز پروګرام به د (۹) میاشتو په موده کې بشپړ شي او له فراغت وروسته به د شهیدانو کورنیو او معلولینو ته د کار د پیل په موخه اړین وسایل او امکانات هم برابر شي، ترڅو وکولای شي د خپلو کورنیو لپاره حلال رزق او عاید ترلاسه کړي.
د شهیدانو او معلولینو چارو رئیس محترم مولوي ګل خان ګل محمد له یادو استادانو څخه وغوښتل چې سپارل شوې دندې یو ایماني او انساني مسؤلیت وګڼي او په پوره صداقت، اخلاص او ژمنتیا سره یې ترسره کړي.
همدارنګه، د یاد ښوونیز ورکشاپ په پای کې د خیریه مؤسسې له لوري ښځینه ښوونکو ته (۴۵۰۰) او نارینه ښوونکو ته (۳۰۰۰) افغانۍ د نغدي مرستې په توګه ورکړل شوې.
