په پکتیکا ولايت کې د مجردو شهیدانو کورنیو سره نغدي مرستې ترسره شوې
د شهیدانو کورنیو او معلولیت لرونکو وګړو ته د خدمتونو وړاندې کولو له بهير څخه د ارزونې په موخه، د پکتیکا ولايت د شهیدانو او معلولینو چارو رئيس محترم مولوي محمد نبي وهاج په مشرۍ يو پلاوي يحيی خيل او زرغون شهر ولسواليو ته سفرونه ترسره کړل، دمجردو شهیدانو کورنیو سره یې له نږدې وکتل، د هغوی احوال یې واخیست، ستونزې او غوښتنې یې واوریدې او اړتیاوو ته یې د بشپړې رسېدنې ډاډ ورکړ، د یادو کورنیو د اقتصادي ستونزو د حل په موخه یې یو اندازه نغدي مرستې هم ترسره کړې.
همداراز نوموړي یتیمانو، کونډو او معلولینو ته د اغېزمنو خدمتونو وړاندې کولو او د هغوی د کور په کور سروې د بهير د لا ښه والي په موخه اړوندو مدیرانو ته یې لازمې لارښوونې وکړې.
د سفرونو په لړ کې د شهیدانو او معلولینو چارو رئیس د یادو ولسوالیو له مسؤلینو سره هم لیدنې وکړې او له هغوی یې وغوښتل چې د شهیدانو کورنیو او معلولینو ته د لا غوره خدمتونو د وړاندې کولو لپاره خپلې همکارۍ لا پراخې او دوامدارې وساتي.
