معلولیت لرونکو وګړو او د شهیدانو وارثینو ته حرفوي او مسلکي زده کړې ورکول کېږي

معلولیت لرونکو وګړو او د شهیدانو وارثینو ته حرفوي او مسلکي زده کړې ورکول کېږي

د شهیدانو او معلولینو په چارو کې د دولت وزارت او مېرسي کورپ (Mercy Corps) موسسې تر منځ د معلولیت لرونکو وګړو د حرفوي او مسلکي کاري ځواک پیاوړتیا او ګمارنې برنامې د تطبیق دوه اړخیز هوکړه لیک لاسلیک شو.

نن سه شنبه د ( کب میاشتې ۶ نېټه) د شهیدانو او معلولینو په چارو کې د دولت وزارت د تخنیکي چارو مرستیالې جمیلې نورستانۍ او د مېرسي کورپ موسسې د حرفوي او مسلکي زده کړو رییسې ملیزا لکایو د غازي امان الله خان د غونډو په تالار کې د معلولیت لرونکو وګړو د کاري ځواک د پیاوړتیا او په مختلفو ادارو کې د دوی د ګمارنې دوه اړخیز هوکړه لیک لاسلیک کړ.

یاد هوکړه لیک په دریو فصلونو او ۳۲ مادو کې ترتیب او د تطبیق په برخه کې یې د دواړو بنسټونو مسولیتونه مشخص شوي دي.

د دې هوکړه لیک له مخې به مېرسي کورپ موسسه د شهیدانو او معلولینو په چارو کې د دولت وزارت سره په مرکز او ولایتونو کې د معلولیت لرونکو وګړو او د شهیدانو ورثې ته د تخنکي او مسلکي زده کړو،حرفوي، مسلکي کاري وړتیا لوړونې او په مختلفو ادارو کې د ګمارنې د خدمتونو وړاندې کولو په موخه د همغږۍ رامنځته کول دي، تر څو د دې برنامې له لارې روزل شوي معلولین او د شهیدانو وراثین حرفوي کارونو ته لاسرسی ومومي.

د هوکړه لیک له لاسلیک وروسته یاده موسسه د شهیدانو او معلولینو په مرکز کې یاد قشر ته د حرفوي زده کړو پروګرام پیلوي او د دریو کلونو په موده کې به ۸۰۰۰ په شرایطو برابرو کسانو ته د شهیدانو د ورثې او معلولینو د یوه حرفوي مرکز په ګډون د بازار د ارزونې پروسې له لارې په ۲۲ مرکزونو کې دوی ته زده کړې ورکول کېږي.

د دې هوکړه لیک اصلي موخه د معلولیت لرونکو وګړو او د شهیدانو د ورثې د اقتصادي ستونزو پېژندنه، له منځه وړل او د دوی ځان بسیاینه ده. دا برنامه په لومړي پړاو کې په کندهار، هلمند، پروان، کابل، هرات او ننګرهار ولایتونو کې عملي کېږي.

د برنامې له پیل سره په اول مرحله کې معلولین او شهیدانو د ورثې ۱۸۸ تنه تر پوښښ لاندې نیول کېږي او په دویم پړاو کې به د یاد قشر ۱۵۰ -۲۰۰ تنه د شهیدانو او معلولینو د حرفوي زده کړو په مرکز کې وروزي.

د شهیدانو او معلولینو په چارو کې د دولت وزارت د دې برنامې د ټولو فعالیتونو او د شهیدانو او معلولینو د مرکز په کچه د کاري پرمختګونو ارزونه کوي او له ارزونې ترلاسه شوې پایلې به د کارونو د لا ښه والي په موخه یادې موسسې سره شریکوي.

د مېرسي کورپ موسسه یو نړیوال بنسټ دی او له ۱۹۸۶ز کال راهیسې په افغانستان کې د ځوانانو د دوامداره ملاتړ، پرمختګ، ګرهنیزو چارو او مسلکي مهارتونو د لوړولو او د معلولیت لرونکو وګړو د شهیدانو د کورنیو پیاوړي کول دي.