د کوچیانو چارو سمون لوی رئیس استاد حبیب الرحمن ښاغلي لعل الدین آریوبي سره وکتل
د کوچیانو پر ستونزو خبرې وشوې!
د کوچیانو چارو سمون لوی رئیس استاد حبیب الرحمن د شهیدانو او معلولینو په چارو کې ددولت وزیر ښاغلي لعل الدین آریوبي سره ګډه کاري ناسته وکړه.
ښاغلي حبیب الرحمن د کوچي قشر د شهیدانو د وارثینو او معلولیت لرونکو وګړو پر ستونزو هر اړخیزې خبرې وکړې او د شهیدانو او معلولینو په چارو کې ددولت له وزیر څخه یې وغوښتل، چې دې قشر ته باید ځانګړۍ پاملرنه وکړي. نوموړي همدارنګه د دوو ادارو تر مینځ د دوامدارو اړیکو په درلودلو هم ټینګار وکړ.
د شهیدانو او معلولینو په چارو کې د دولت وزیر ښاغلي لعل الدین آریوبي له استاد حبیب الرحمن څخه مننه وکړه چې د کوچیانو د ستونزو له منځه وړلو لپاره هلې ځلې کوي. ښاغلي آریوبي ژمنه وکړه چې یاده اداره به په ټولو برخو کې د کوچي قشر د شهیدانو وارثینو او معلولیت لرونکو وګړو ته خاصه پاملرنه کوي.
