د کابل ولایت په ده سبز ولسوالۍ کې د لسو یتیمانو کورنیو لپاره د استوګنې کورونو د جوړولو چارې بشپړې شوې
د کابل ولایت د شهیدانو او معلولینو چارو ریاست د (HHRD) خیریه مؤسسې په همغږۍ د لسو مستحقو یتیمانو د کورنیو لپاره د کابل په ده سبز ولسوالۍ کې د استوګنې کورونو د جوړولو چارې بشپړې کړې چې نن د رسمي مراسمو په ترڅ کې کورونه مستحقو کورنیو ته وسپارل شول.
د یادو کورونو د پرانيستلو په مراسمو کې د بهرنیو اړیکو، پلان او تقنین چارو رئیس محترم مولوي ثناء الله فرقاني، د کابل ولایت د شهیدانو او معلولینو چارو رئیس محترم ملا شیر محمد صمیم، د ده سبز ولسوالۍ مرستیال محترم مولوي خان زمان نصرت، د (HHRD) خیریه مؤسسې رئیس محترم قاري عبیدالله فیصل، د څارنې او ارزونې ریاست استازي، د ده سبز ولسوالۍ امنیه قوماندان او اړوند کارکوونکو شتون درلود.
په دې پروګرام کې محترم مولوي ثناءالله فرقاني د قرآن عظیمالشان د مبارکو آیتونو او د نبوي صلی الله علیه و سلم احادیثو په رڼا کې د یتیمانو د حقوقو په اړه هر اړخیزې خبرې وکړې، د (HHRD) خیریه مؤسسې له مسؤلینو څخه یې د هغوی د دوامدارو همکاریو په پار مننه وکړه او د اړتیا وړ کورنیو ته یې د اقتصادي ځان بسیاینې په برخه کې د هغوی فعالیتونه وستایل.
همداراز په دې پروګرام د (HHRD) خیریه مؤسسې رئیس محترم قاري عبیدالله فیصل د یادې مؤسسې د فعالیتونو په اړه مفصل معلومات وړاندې کړل او وې ویل؛ يادې مؤسسې د (۲۹) تنو یتیمانو او کونډو لپاره لس کورونه یې په ده سبز ولسوالۍ کې او نه (۹) کورونه یې په ننګرهار ولایت کې جوړ کړي دي، سربېره پر دې، د کابل ښار په (۸)، (۹) او (۱۲) ناحیو کې هم د لسو نورو کورونو د جوړولو چارې روانې دي چې په دې سره د هغوی ستونزو ته تر ډېره حده رسيدګۍ شوې ده.
د یادونې وړ ده چې یاد کورونه دوه خونې، یو پخلنځی، یو تشناب او يو دهلېز لري او په بنسټیز او معیاري ډول جوړ شوي دي.
