د شهیدانو او معلولینو چارو په وزارت کې پر یو شمېر معلولیت لرونکو وګړو باندې برېښنایي ویلچرونه ووېشل شول
د شهیدانو او معلولینو چارو وزارت د معلولیت لرونکو وګړو د ستونزو راکمولو او هغوی ته د ژوند اسانتیاوو رامنځته کولو په موخه د یوې خیریه مؤسسې سره په همغږۍ د اتیا (۸۰) تنو معلولینو لپاره برېښنایي ویلچرونه چمتو کړي دي، نن په دې وزارت کې ديرش (( ٣٠ )) مستحقو معلولینو برېښنایي ویلچرونه ترلاسه کړل، او پاتې نورو ته به هم په نږدې ورځو کې ورته ویلچرونه ووېشل شي، په دې ترتیب هر مستحق معلول تقریباً د (۸۰۰) امریکایي ډالرو په ارزښت برېښنايي ويلچرونه ترلاسه کړ.
یاد ویلچرونه د شهیدانو او معلولینو چارو وزارت د مرستیال محترم شیخ صاحب عبدالحکیم حقاني، د ټولنیزو خدمتونو د تنظیم رئیس محترم مولوي ثناء الله فرقاني، د کابل ولایت د شهیدانو او معلولینو چارو رئیس محترم قاري شمس الامین زهیر، د څارنې او ارزونې ریاست استازي او د مؤسسې د مسؤلینو په شتون کې په شفاف او منظم ډول پر مستحقو کسانو باندې ووېشل شول.
د یادونې وړ ده چې هر مستحق ته د ویلچرونو سربېره یو اندازه نغدي مرستې د لارې کرایې په توګه هم ورکړل شوې.
