د شهیدانو او معلولینو چارو وزارت د رهبري شورا غونډه ترسره شوه
د شهیدانو او معلولینو چارو وزارت د رهبري شورا غونډه ترسره شوه
د شهیدانو او معلولینو چارو وزارت د برنامو او همغږۍ مرستیالې او د وزارت سرپرست آغلې صبرۍ اندړ په مشرۍ د نظامي شهیدانو وارثینو ته د کلنيو حقونو ورکړې پروسې د چټکتیا په اړه د رهبري شورا ناسته ترسره شوه.
په پیل کې د شهیدانو او معلولینو چارو وزارت د ملاتړ او خدمتونو وړاندې کوونکې معاونيت مرستیالې آغلې جمیلې نورستانۍ د نظامي شهیدانو وارثینو د اسنادونو او وثيقو د څیړنې راپور وړاندې کړ. آغلې نورستانۍ وویل: د نظامي شهیدانو یو شمیر وارثین الیکترونیکي تذکرې نلري، اسنادونه یې هم نه دي څیړل شوي، چې له امله یې د کلني حقونو په ورکړه کې ځنډ رامینځته شوی دی.
ورپسې د سترې محکمې استازی قاضي عبدالباري د وثایقو د څیړنې پروسې پر څرنګوالي او د اړوندو ادارو پر همغږي ټینګار وکړ.
په پای کې پریکړه وشوه چې د نظامي شهیدانو ټولو وارثینو ته چې الیکترونیکي تذکره ولري او اسنادونه یې څیړل شوي وي، یو کلن حقوق او پاتې نورو ته به د شپږو میاشتو حقوق ورکړل شي، پر دې سربیره اړوندو برخو ته دنده وسپارل شوه چې راتلونکي شپږو میاشتو کې د اسنادونو د څیړنې پروسه بشپړه کړي.
