د شهیدانو او معلولینو چارو وزارت د بشري سرچینو ریاست لخوا د کارکوونکو د مهارتونو او ظرفیتونو د لوړولو په موخه د کمپیوټر زده کړه ییز ورکشاپ دایر شو
د دې روزنیز پروګرام په پرانیست غونډه کې د شهیدانو او معلولینو چارو وزارت سرپرست وزیر محترم الحاج ملا عبدالمجید آخند، د شهیدانو او معلولینو چارو مرستیال محترم شیخ صاحب عبدالحکیم حقاني، د مالي او اداري چارو عمومي رئیس محترم مولوي کلیم الله افغان او د دې وزارت اړوندو څانګو رئیسانو، آمرینو او کارکوونکو ګډون کړې وو.
دغه روزنیز ورکشاپ د شهیدانو او معلولینو چارو وزارت د سرپرست وزیر محترم الحاج ملا عبدالمجید آخند لخوا د پټۍ په پرې کولو سره پرانیستل شو، ټاکل شوې چې په دې روزنیز ورکشاپ کې به پنځوسو (۵۰) تنو کارکوونکو ته د کمپیوټر زده کړې ورکړل شي.
همداراز د دې پروګرام په ترڅ کې دهغه حمایوي صندوق په هکله هم خبرې وشوې چې د یتیمانو، کونډو او معلولینو لپاره د مرستو د جلب په موخه رامنځته شوی دی.
په دې پروګرام کې د شهیدانو او معلولینو چارو وزارت مرستیال محترم شیخ صاحب عبدالحکیم حقاني د یتیمانو د پالنې پر فضیلت خبرې وکړې او زیاته یې کړه: موږ او تاسې په داسې یوې ادارې کې کار کوو، چې د یتیمانو، کونډو او معلولینو خدمت کوي او په کار ده چې د یتیمانو په حمایوي صندوق کې د خپل وس او توان په اندازه مرسته وکړو.
نوموړي همداراز وویل: خدای تعالی جل جلاله دا نعمت پر افغانانو پیرزو کړی چې په هېواد کې یې اسلامي امارت حاکم شوی او د دې نظام له برکته په ټول هېواد کې آزادۍ، امنیت او سوکالۍ راغلې ده او باید د فلسطین هېواد د مظلومو مسلمانانو لپاره هم غږ پورته کړو او کافرانو باندې ډیر سخت اووسو او پر مسلمانانو باندې شفقت او مهرباني ولرو.
په دې پروګرام کې د شهیدانو او معلولینو چارو وزارت د مالي او اداري چارو عمومي رئيس محترم مولوي کلیم الله افغان په اسلام سپیڅلي دین کې د یتیمانو د پالنې پر فضیلت او ارزښت هر اړخیزې خبرې وکړې او زیاته یې کړه: د حضرت رسول اکرم صلی الله علیه وسلم د مبارک حدیث د روایت پر اساس خدای تعالی جل جلاله ته هغه عملونه ډیر محبوب دي چې دوامداره وي که هغه لږ هم وي.
نوموړي د یاد وزارت له کارکوونکو څخه وغوښتل ترڅو د خپل وس په اندازه د یتیمانو حمایوي صندوق سره همکاري وکړي.
په دې پروګرام کې د یاد وزارت د عوت او ارشاد رئیس محترم مفتي عبدالاحد مسعود هم د یتیم پالنې د ارزښت په هکله وویل: د یتیم پالنې بنیاد زموږ خوږ پیغمبر صلی الله علیه وسلم ایښی دی، پر موږ او تاسو لازمه ده چې د یتیمانو پالنه وکړو، یتیم پالنه د جهنم څخه د نجات وسیله ګرځي.
همداراز په دې پروګرام کې د بشري سرچینو رئيس محترم مولوي محمد موسی صدیقي د یتیمانو د حمايوي صندوق د رامنځته کولو د اهمیت په هکله وویل: د دې صندوق اصلي موخه د یتیمانو کونډو او معلولینو لپاره د مرستو را ټولول دي چې د وزارت هر کارکوونکی به په خپله خوښه په هغه کې ونډه اخلي.
نوموړي همداراز د بشري سرچینو ریاست د دوه کلنو لاسته راوړنو په هکله هم هر اړخیز معلومات وړاندې کړل.
