د شهیدانو او معلولینو چارو وزارت او د (HHRD) نړيوالې مؤسسې ترمنځ د (۳) میلیونه او (۶۲۷) زره افغانیو په ارزښت هوکړه لیک لاسلیک شو
د شهیدانو او معلولینو چارو وزارت د شهیدانو کورنیو او معلولینو د اقتصادي ځان بسیاینې په موخه، د (HHRD) خیریه مؤسسې سره د (۳) میلیونه او (۶۲۷) زره افغانیو په مجموعي ارزښت د همکارۍ هوکړه لیک لاسلیک کړ.
یاد هوکړه لیک د دې وزارت د بهرنیو اړیکو، پلان او تقنین چارو رئيس محترم مولوي ثناء الله فرقاني او د (HHRD) نړيوالې مؤسسې مرستیال محترم همايون نوري ترمنځ لاسلیک شو.
د دې هوکړه ليک له مخې، د (۶۲۰) یتیمانو او معلولینو د وړتیا لوړولو په موخه، په ننګرهار او لغمان ولایتونو کې د موبایل ترمیم، انګلیسي ژبې، د کمپیوټر سافټویر او خیاطۍ په برخو کې ښوونیزې برنامې پیل شي، تر څو ګډونوال د کار بازار ته اړوند مهارتونه زده کړي او د پروګرام له پای ته وروسته وکولای شي په خپلواکه توګه کار وکړي او د اقتصادي ځانبسیاینې زمینه برابره کړي.
د یادونې وړ ده چې یاده پروژه به د ننګرهار او لغمان ولایتونو د شهیدانو او معلولینو چارو ریاستونو سره په همغږۍ د یو کال په موده کې پلي شي.
