د شهیدانو او معلولینو چارو وزارت او د قمر خیریه بنسټ ترمنځ د همکارۍ هوکړه لیک لاسلیک شو
د شهیدانو او معلولینو چارو وزارت په روژې مبارکه میاشت کې د یتیمانو، کونډو او معلولینو د لاسنیوي او ملاتړ په موخه، د قمر خیریه بنسټ سره د یو میلیون (۱۶) زره او (۵۰۰) افغانیو په ارزښت د همکارۍ هوکړه لیک لاسلیک کړ، چې له مخې به یې په غزني او زابل ولایتونو کې د شهیدانو او معلولینو (۱۹۰) مستحقو کورنیو لپاره (۷) ډوله بېلابېل خوراکي توکي چمتو او ووېشل شي او هره کورنۍ به د (۵۳۵۰) افغانیو په ارزښت مرستې ترلاسه کړي.
د همکارۍ دغه هوکړه لیک د بهرنیو اړیکو، پلان او تقنین چارو رئیس محترم مولوي ثناء الله فرقاني او د قمر خیریه بنسټ د استازي محترم ریاض احمد صافي ترمنځ لاسلیک شو، د یوې میاشتې په موده کې به د زابل او غزني ولایتونو د شهیدانو او معلولینو چارو ریاستونو سره په همغږۍ تطبیق شي.
