د شهیدانو او معلولینو چارو وزارت، د اداري اصلاحاتو او ملکي خدمتونو د ادارې او کابل ښاروالۍ ترمنځ د اداري پروسو د ساده کولو په موخه هوکړه لیک لاسلیک شو
په هغه پروګرام کې چې په همدې موخه د اداري اصلاحاتو او ملکي خدمتونو د ادارې د غونډو په تالار کې جوړ شوی وو، په هغه کې د چارو ادارې عمومي رئیس ښاغلي شیخ الحدیث مولوي نورالحق انور، د شهیدانو او معلولینو چارو وزارت مرستیال ښاغلي شیخ صاحب عبدالحکیم حقاني، د یاد وزارت د مالي او اداري چارو عمومي رئیس ښاغلي مولوي کلیم الله افغان، د اداري اصلاحاتو او ملکي خدمتونو رئیس ښاغلي مولوي عبدالحنان عارف الله، د کابل ښاروالۍ د ښاري خدمتونو مرستیال مولوي محمد خالد سجستاني او د اړوندو ادارو یو شمېر رئیسانو برخه اخيستې وه.
په دې پروګرام کې د چارو د ادارې عمومي رئیس ښاغلي شیخ الحدیث مولوي نورالحق انور د یاد هوکړه لیک د اهمیت په اړه خبرې وکړې او زیاته یې کړه: د دغه تفاهم لیک په لاسلیک کولو سره به په اداري چارو کې هر اړخیز شفافیت رامنځ ته او هیوادوالو ته به په یادو برخو کې لا نورې اسانتياوې برابرې شي. نوموړي زیاته کړه، اسلامي امارت ژمن دی چې د هیوادوالو لپاره غوره او معیاري خدمتونه وړاندې کړي.
په دې پروګرام کې د شهیدانو او معلولینو چارو وزارت مرستیال ښاغلي شیخ صاحب عبدالحکیم حقاني د یادو ادارو ترمنځ د اداري پروسو د ساده کولو او د روڼتیا په رامنځ ته کولو ټینګار وکړ.
نوموړي د اړوندو ادارو له رئيسانو هم وغوښتل، چې له شته امکاناتو څخه اعظمي ګټه پورته کړي او د هېواد دردېدلي ولس ته د پام وړ خدمتونه وړاندې کړي.
نوموړي د اسلامي امارت د مجاهدینو د سرښندنو او قربانیو په اړه هم خبرې وکړې او ویې ویل: د اسلامي امارت مجاهدینو په تیرو شلو کلونو کې د اسلامي نظام د تنفیذ په برخه کې بې شمیره قربانۍ ورکړي دي چې د الهي نصرت په مرسته په هیواد کې اسلامي نظام رامنځ ته شو.
په دې پروګرام کې د اداري اصلاحاتو او ملکي خدمتونو د ادارې رئیس ښاغلي مولوي عبدالحنان عارف الله هم د یاد هوکړه لیک په ارزښت او اهمیت خبرې وکړې او زیاته یې کړه: د اسلامي امارت له رامنځ ته کیدو څخه تراوسه (۳۶۴) د اداري چارو د ساده کولو پروسې په مختلفو ادارو کې ترسره شوې دي او د یادو هوکړه لیکونو اصلي موخه په اداري چارو کې د چټکتیا او روڼتیا رامنځته کول دي.
دغه راز په دې پروګرام کې د کابل ښاروالۍ د ښاري خدمتونو مرستیال ښاغلي مولوي خالد سجستاني هم د اداري پروسیجر د ساده کولو د اهمیت په اړه خبرې وکړې او زیاته یې کړه: د دې هوکړه لیک په پلي کیدو سره به اداري چارې چټکې او د وخت د ضایع کیدو او همدارنګه د فساد مخه به ونیول شي.
