د شهیدانواومعلولینو چارو وزارت د رهبرۍ لخوا د ظرفیت لوړونې ورکشاپ درې اتیا تنو ګډونوالو ته تصدیق نامې ورکړل شوې
یاد روزنیز ورکشاپ چې د شهیدانو او معلولینو چارو وزارت د بشري سرچینو ریاست د ظرفیت لوړونې پروګرامونو د آمریت له لورې په لاره اچول شوی وو چې په هغه کې د شهیدانو او معلولینو چارو وزارت ولایتي رئیسانو او کارکوونکو ته په دوو مرحلو کې د اداري اساساتو او پلان جوړونې په برخه کې په دوه اونېو کې روزنه ورکړل شوه او په پای کې د وزارت د رهبرۍ لخوا د ورکشاپ ګډونوالو ته د یوې غونډې په ترڅ کې تصدیق نامې وویشل شوې.
په هغه غونډه کې چې په همدې موخه د شهیدانو او معلولینو چارو په وزارت کې جوړه شوې وه، د شهیدانو او معلولینو چارو وزارت سرپرست وزیر ښاغلي ملا عبدالمجید آخند، د یاد وزارت تخنیکي او مسلکي مرستیال ملا عبدالرزاق آخند، د شهیدانو او معلولینو چارو مرستیال شیخ صاحب عبدالحکیم حقاني، د مالي او اداري چارو عمومي رئیس ښاغلي مولوي کلیم الله افغان او د اړوندو څانګو رئیسانو ګډون درلود.
د غونډې په پیل کې د شهیدانو او معلولینو چارو وزارت مرستیال ښاغلي شیخ صاحب عبدالحکیم حقاني ولایتي رئیسانو اوکارکوونکو لپاره د دې ډول روزنیز پروګرامونو په لاره اچول مهم او اړین ګام وباله، او زیاته یې کړه: د یاد ورکشاپ څخه د ګټې اخیستنې سره به یاد کارکوونکو وکولاې شي د یتیمانو او معلولیت لرونکو وګړو او د هغوی کورنېو ته غوره خدمتونه وړاندې کړي.
نوموړي د شهیدانو او معلولینو چارو وزارت کارکوونکي وهڅول تر څو د مراجعینو سره له غوره اخلاقو څخه کار واخلي او خپلې چارې په ښه توګه پرمخ یوسي.
د مالي او اداري چارو عمومي رئیس ښاغلي مولوي کلیم الله افغان هم چې په یادې غونډې کې ګډون درلود، ویې ویل: کارکوونکو ته د مسلکي زده کړو او د مهارتونو د لوړولو په برخه کې باید لاډیرې هڅې وشي، نوموړي د بشري سرچینو ریاست لخوا پرانیستل شوی روزنیز ورکشاپ یو مهم نوښت وباله او د اداري اصلاحاتو او ملکي خدمتونو د انسټیټیوټ څخه راغلي ترینرانو څخه یې مننه وکړه، هغه همداراز د خبرو په ترڅ د ریاستونو تر منځ پر همغږۍ هم ټینګار وکړ.
په یادې غونډه کې د ملکي خدمتونو د انسټیټیوټ رئیس مولوي عبدالرحیم احسان د نوموړي انسټیټیوټ په هکله هر اړخیز معلومات وړاندې کړل او د ورکشاپ له ګډونوالو څخه يې وغوښتل ترڅو یتیمانو او معلولیت لرونکو وګړو سره په مالي او معنوي برخه کې د وزارت د کړنلارې سره سم اړین خدمتونه وړاندې کړي.
ددې غوڼدې په ترڅ کې د شهیدانو او معلولینو چارو وزارت د بشري سرچینو رئیس ښاغلي مولوي محمد موسی صدیقي د یاد وزارت د لاسته راوړنو په هکله هر اړخیز معلومات وړاندې کړل. نوموړي د معلولیت لرونکو او یتیمانو د تثبیت لړۍ پيلول، د یاد وزارت د کارکوونکو د تشکیلاتولوړول، د نوموړي وزارت د کارکوونکو لپاره د دندو د لایحو جوړول او په مالي، تدارکاتي او اداري برخو کې د کارکوونکو د ظرفیت لوړونې په برخه کې د ورکشاپونو په لاره اچول د یاد وزارت مهمې لاسته راوړنې وبللې.
نوموړي د شهیدانو او معلولینو چارو وزارت کارکوونکو ته اداري اصول، مکتوب لیکنې او پلان جوړونې په برخه کې د مهارتونو زده کړه د دې رونیز ورکشاپ اصلي موخه وبلله.
په دې غونډه کې د شهیدانو او معلولینو چارو وزارت د اطلاعاتو او عامه اړیکو مسؤل ښاغلي مفتي فیصل خاموش هم د یاد روزنیز ورکشاپ له ګډونوالو څخه وغوښتل تر څو هغه مهارتونه چې په یاد ورکشاپ کې یې زده کړي دي د چارو پر مخ وړلو کې په ښه توګه ترې ګټه واخلي.
د غونډې په پای کې د کاپیسا ولایت د شهیدانو او معلولینو چارو رئیس مولوي ګل خان احسان د روزنیز ورکشاپ د ګډونوالو پر استازیتوب خبرې وکړې او د کارکوونکو د ظرفیت د لوړونې په برخه کې یې د دا ډول رونیزو ورکشاپونو په لاره اچول مهم او اړین وبلل.
