د بامیانو ولايت کې د شهیدانو او معلولینو پر (۲۰۰) مستحقو کورنېو باندې مرستې وویشل شوې
د بامیانو ولايت د شهیدانو او معلولینو چارو رياست د ترکيې هېواد د تیکا مؤسسې سره په همغږۍ د شهيدانو او معلولینو پر(۲۰۰) مستحقو کورنېو باندې خوراکي توکي چې په هغه کې اوړه، غوړي، روب او عدس شامل وو، وویشل.
د یادو مرستو د ویش پر مهال د بامیانو ولايت والي محترم عبدالله سرحدي، د دې ولايت د شهيدانو او معلولینو چارو رئيس محترم شاه ولي احمدي او د تیکا مؤسسې مسؤلينو حضور درلود.
د یادو مرستو پرمهال د دې ولايت د شهيدانو او معلولینو چارو رئيس محترم شاه ولي احمدي د یادې مؤسسې څخه مننه وکړه او پر نورو مؤسسو او خیریه بنسټونو یې غږ وکړ چې خپلې مرستې د شهيدانو او معلولینو چارو رياست سره په همغږۍ ترسره کړي تر څو له مرستو څخه واقعي مستحقین برخمن شي.
په ورته وخت کې د تیکا مؤسسې رئيس خبرې وکړې او زیاته یې کړه: د ترکیې خلک هم دې ته لیواله دي تر څو د افغانستان له خلکو سره خپلو مرستو ته دوام ورکړي.
