د کابل ښځينه باسکټ بال لوبډلې اتلولي وګټله
د کابل ښځينه باسکټ بال لوبډلې اتلولي وګټله
د سره صلیب په مرسته د ښځینه ویلچیر باسکټ بال ولایتي ټیمونو تر مینځ د پیل شویو سیالیو په پایله کې د کابل لوبډلې، هرات لوبډلې ته په ماتې ورکولو سره لومړۍ مقام خپل کړ او د سياليو اتله لوبډله شوه.
په دغو سياليو کې هرات دویم او بلخ دریم مقامونه ترلاسه کړل.
ددې سیالیو د پایلوبې په غونډه کې د شهیدانو او معلولینو چارو وزارت سرپرست وزیر پوهنمل حمیدالله فاروقي، د سره صلیب د بیارغونې پروژې عمومي رییس البرتو کایرو او د پارا المپیک کمیټې رییس ښاغلی عبدالحسین حصاري هم ګډون درلود.
په پيل کې ښاغلي البرتو کایرو د ښاغلي فاروقي له راتګ او د ښځینه معلولیت لرونکو وګړو له ملاتړ څخه مننه وکړه او ورپسې ښاغلي عبدالحسین حصاري د ښځینه معلولیت لرونکو لوبغاړو ستونزې او غوښتنې شریکې کړې.
ښاغلي پوهنمل حمیدالله فاروقي د معلولیت لرونکو ښځینه ویلچیر باسکټ بال د ولایتي ټیمونو ترمنځ سیالۍ نیک ګام وباله او د سره صلیب له همکاریو یې مننه وکړه وویل: معلولیت لرونکي وګړي د ډیرو ظرفیتونو لرونکي دي، دوي د نورو برخو تر څنګ په سپورتي برخه کې هم په نړیواله کچه د افغانستان نوم روښانه ساتلی. ښاغلي فاروقي زیاته کړه چې د شهیدانو او معلولینو چارو وزارت د یاد قشر د پیاوړتیا په برخه کې بیلابیلې برنامې لري، چې په ۱۴۰۰ کال کې به پلې شي او د سپورټي برنامو په تړاو يې د وزارت له اړخه د هر راز ملاتړ ډاډ ورکړ.
په پای کې لومړۍ، دویم او دریم مقام ګټونکو لوبډلو ته کپ، مډالونه او ډالۍ ورکړل شوې. لوبڅاران او د لوبو تنظیمونکي هم وستایل شول او د یادو سياليو غوره لوبغاړي د ملي ټیم لپاره وټاکل شول.
