د پکتیا ولایت په شهیدانو او معلولینو چارو ریاست کې د یتیمانو، کونډو او معلولیت لرونکو وګړو د بایومټریک پروسه پیل شوه
په هغه غونډه کې چې په همدې موخه د پکتیا ولایت په شهیدانو او معلولینو چارو ریاست کې جوړه شوې وه، په هغې کې د پکتیا ولایت مرستیال والي، د شهيدانو او معلولينو چارو وزارت د دېټابیس رئیس ښاغلي ملا رحمت الله خالد، د نوموړي ولایت د شهیدانو او معلولینو چارو رئیس ښاغلي مولوي محمد نبي او ځینو نورو مسؤلینو ګډون کړی وو.
په یاده غونډه کې د پکتیا ولایت مرستیال والي د یتیمانو د پالنې پر اهمیت خبرې وکړې او د هغوی سره مرسته او د هغوی لاسنيوی نیک او غوره دنده وبلله.
د یادې غونډې په ترڅ کې د شهیدانو او معلولینو چارو وزارت د دېټابیس رئیس ښاغلي ملا رحمت الله خالد د بایومټریک پروسې د اهمیت او ارزښت په هکله هر اړخیزې خبرې وکړې او د معلولینو، کونډو او یتیمانو د تثبیت په پروسه کې د شفافیت او روڼتیا رامنځته کولو لپاره یې د بایومټریک پروسه اړینه او مهمه وبلله.
په ورته وخت کې د پکتیا ولایت د شهيدانو او معلولينو چارو رئیس ښاغلي مولوي محمد نبي په تیر کال کې د نوموړي ریاست د لاسته راوړنو په هکله هر اړخیز معلومات وړاندې کړل، نوموړي همداراز یتیمانو، کونډو او معلولیت لرونکو وګړو ته د میاشتنې نغدي مرستو د ورکړۍ په هکله هم خبرې وکړې او همداراز ډاډ یې ورکړ چې یاد ریاست به معلولینو او یتیمانو ته به په شفاف ډول خدمتونه وړاندې کوي.
