د شهیدانو او معلولینو چارو وزیر محترم الحاج ملا عبدالمجید آخند فراه ولایت ته سفر وکړ
د شهیدانو او معلولینو چارو وزیر محترم الحاج ملا عبدالمجید آخند چې د هېواد لوېدیځ ولایتونو ته په سفر تللی، د نیمروز ولایت د شهیدانو او معلولینو چارو په ریاست کې د مجردو شهیدانو کورنیو او معلولیت لرونکو وګړو سره د لیدنې او د هغوی سره د نغدي مرستو د ترسره کولو وروسته، نن فراه ولایت ته ورسید، د دعوت او ارشاد رئیس محترم مفتي عبدالاحد مسعود، د مالي او حسابي چارو رئيس محترم مولوي محمد امین دروېش، د ټولنیزو خدمتونو د تنظیم ریاست آمر محترم ملا ابراهیم شاه خلیل او د وزارت مقام سکرتر محترم حافظ نورمحمد په دې سفر کې د محترم وزیر صاحب ملتیا کوي.
د شهیدانو او معلولینو چارو محترم وزیر د فراه ولایت د شهیدانو او معلولینو چارو په ریاست کې د والي مرستیال محترم مولوي رحیم الله محمود په حضور کې د مجردو شهیدانو کورنیو سره لیدنه وکړه، د هغوی احوال یې له نږدې واخیست او ورسره یې یو اندازه نغدي مرسته هم ترسره کړه.
د فراه ولایت د والي مرستیال محترم مولوي رحیمالله محمود د محترم وزیر صاحب د سفر هرکلی وکړ او دا یې یو نیک اقدام وباله، هغه زیاته کړه چې د شهیدانو کورنیو احوال اخیستل د اسلامي امارت د ژمنې او وفادارۍ څرګندونه ده او د دې ډول کړنو دوام د خلکو د هوساینې او ډاډ سبب ګرځي.
همداراز د دعوت او ارشاد رئیس محترم مفتي عبدالاحد مسعود د قرآن عظیمالشان د مبارکو آیاتونو او د نبي کریم صلی الله علیه وسلم د سپېڅلو احادیثو په رڼا کې د شهادت د لوړ مقام او فضیلت په اړه وینا وکړه او زیاته یې کړه چې د شهیدانو ورثه او د معلولینو سره د اسلامي امارت تعلق ژوندی دی او همداسې به ژوندی پاتې شي، په همدې موخه د شهیدانو او معلولینو چارو محترم وزیر دې ولایت ته سفر کړی، څو د شهیدانو او معلولینو کورنیو سره له نږدې لیدنه وکړي، د هغوی احوال واخلي او هغه تحفه چې د عالیقدر امیرالمؤمنین حفظهالله تعالی له لوري د مجردو شهیدانو کورنیو ته ځانګړې شوې ده، یادو کورنیو ته وسپاري.
همداراز محترم مفتي عبدالاحد مسعود وویل چې اسلامي امارت د الله جل جلاله یو ستر احسان دی چې د افغانانو لپاره یې نصیب کړی او د دې اسلامي نظام لپاره یې یو مهربان او مشفق رهبر ټاکلی دی، چې وخت په وخت د خلکو، په ځانګړي ډول د شهیدانو کورنیو او معلولینو پوښتنه کوي او د هغوی احوال اخلي.
په ورته وخت کې د مجردو شهیدانو کورنیو په استازیتوب یوه تن خبرې وکړې او ویې ویل چې زموږ د کورنۍ غړو په هېواد کې د اسلامي نظام د ټینګښت لپاره لویه قرباني ورکړې ده. هغوی شهیدان شوي او بندخونې یې هم تجربه کړې دي، خو بیا هم موږ د اسلامي امارت د دفاع لپاره چمتو او هر ډول خدمت ته تیار یو.
