د شهیدانو او معلولینو چارو وزارت پلاوي په ننګرهار ولایت کې د دې وزارت اړوند ریاست له کاري بهیر څخه ارزونه ترسره کړه
د شهیدانو او معلولینو چارو وزارت د دعوت او ارشاد رئیس محترم مفتي عبدالاحد مسعود په مشرۍ یو پلاوی د کارکوونکو چارو رئیس محترم مولوي محمد موسی صدیقي او د مالي او حسابي چارو رئیس محترم مولوي محمد امین دروېش په ملتیا ننګرهار ولایت ته سفر وکړ، نوموړي پلاوي هلته د شهیدانو او معلولینو چارو ریاست له کاري بهیر څخه ارزونه ترسره کړه او د کارکوونکو سره یې د چارو د لاښه سمون او یتیمانو، کونډو مېرمنو او معلولینو ته د لاښو خدمتونو وړاندې کولو په موخه غونډه ترسره کړه.
په دې غونډه کې د دعوت او ارشاد رئیس محترم مفتي عبدالاحد مسعود، د دعوت او ارشاد چارو اړوند پر مهمو موضوعاتو هر اړخیزې خبرې وکړې او هغه یې د ټولنې د هدایت، د دیني ارزښتونو د پیاوړتیا او د فردي او ټولنیزو چلندونو د اصلاح لپاره یو مهم او اغېزناک اړخ وباله. ورپسې، د کارکوونکو چارو رئیس محترم مولوي محمد موسی صدیقي، د یو لړ اداري موضوعاتو په اړه خبرې وکړې او د سپارل شویو مسؤلیتونو د سم مدیریت لپاره یې پر نظم، مسؤلیتپذیرۍ او همغږۍ ټینګار وکړ. همداراز، د غونډې په پای کې، د مالي او حسابي چارو رئیس محترم مولوي محمد امین درویش، د اسلامي نظام د ساتنې او پیاوړتیا په اهمیت مفصلې او ارزښتناکې څرګندونې وکړې.
په ورته وخت کې د ننګرهار ولایت د شهیدانو او معلولینو چارو رئیس محترم مولوي نورالحق حقاني د یاد پلاوي له ورتګ څخه یې خوښي وښوده او ډاډ یې ورکړ چې د شهیدانو ورثه وو او معلولینو لپاره به د ښو او غوره خدمتونو وړاندې په برخه کې لا زیاتې هڅې وکړي.
