د شهیدانو او معلولینو چارو وزارت سره د (۵۰) برېښنایي چپرکټونو مرسته ترسره شوه
د شهیدانو او معلولینو چارو وزارت د بهرنیو اړیکو، پلان او تقنین چارو ریاست په هلو ځلو د ترکیې هېواد د نداء الخیر مؤسسې له لوري د پنځوسو (۵۰) برېښنایي چپرکټونو مرسته ترسره شوه.
د یادو چپرکټونو له جملې څخه (۲۰) یې په هرات ولایت کې د شهیدانو او معلولینو چارو ریاست ته وسپارل شول تر څو له هغه ځایه د ګاونډیو ولایتونو فلج معلولینو ته ووېشل شي او پاتې دېرش (۳۰) چپرکټونه د سرې میاشتې مرکزي دفتر له لارې کابل ته ورسیدل چې د وزارت د بهرنیو اړیکو، پلان او تقنین چارو رئیس محترم ملا صدوخان حق شناس ته وسپارل شو تر څو مستحقو فلج معلولینو ته ووېشل شي.
دغه برېښنايي چپرکټونه د معلولینو لپاره ډېر ګټور دي، ځکه چې ځانګړو امکاناتو سره ډیزاین شوي، د دې چپرکټونو کارول د معلولینو سره مرسته کوي چې پرته د نورو کسانو له مرستې، د خپل بدن حرکتونه تنظیم کړي.
محترم ملا صدوخان حق شناس د ترکیې هېواد د نداء الخیر مؤسسې څخه یې مننه وکړه او دغه مرسته یې د معلولینو ژوند د ښه کولو او د هغوی د هوساینې په برخه کې یو مؤثر ګام وباله.
