د شهیدانو او معلولینو چارو وزارت او د افغان مېرمنو د حقوقي خدمتونو مؤسسې تر منځ د هوکړه لیک لاسلیک
د شهیدانو او معلولینو چارو وزارت د کونډو او معلولیت لرونکو مېرمنو د ملاتړ په موخه، د افغان مېرمنو د حقوقي خدمتونو مؤسسې سره د (۷۱) زره او (۱۵۸) ډالرو په ارزښت هوکړه لیک لاسلیک کړ، چې له مخې به یې د جوزجان ولایت اړوند (۱۸۵) تنو کونډو او معلولیت لرونکو مېرمنو ته خوراکي مواد او همداراز (۳۲۸) نورو مستحقو کورنیو ته به، د اقتصادي خودکفایۍ په موخه، د کرنیزو توکو کڅوړۍ وویشل شي.
د همکارۍ دغه هوکړه لیک د دې وزارت د بهرنيو اړیکو او پلان رئيس محترم ملا صدوخان حق شناس او د افغان مېرمنو د حقوقي خدمتونو مؤسسې رئیس محترم سید فرهاد الله عبادي ترمنځ لاسلیک شو او د جوزجان ولایت د شهیدانو او معلولینو چارو ریاست سره په همغږۍ به پلي شي.
د هوکړه لیک د لاسلیک پر مهال محترم ملا صدوخان حق شناس د یتیمانو، کونډو او معلولینو پر وړاندې شته ستونزې د مؤسسې له مشر سره شریکې کړې او له هغه یې وغوښتل چې د دې ډول مرستو د وېش لړۍ د هېواد نورو ولایتونو ته هم وغځوي، تر څو دا اړمن قشر له دوامداره ملاتړ څخه برخمن شي.
