د شهیدانو او معلولینو چارو وزارت او د آشیانه مؤسسې ترمنځ د هوکړه لیک لاسلیک
د شهیدانو او معلولینو چارو وزارت د پلان، بهرنېو اړیکو او تقنین ریاست د آشیانه خیریه مؤسسې سره هوکړه لیک لاسلیک کړ چې موخه یې یتیمانو، کونډو مېرمنو او معلولینو ته د ښه ژوند فرصتونو برابرول دي. د دې هوکړه لیک له مخې به، په سمنګان ولایت کې د شهیدانو ورثه وو او معلولینو (۱۳۰۰) کورنيو لپاره په (۹) بېلابېلو برخو کې حرفوي پروګرامونه پېل شي، ترڅو هغوی د حرفوي مهارتونو په زدهکړې سره له اقتصادي اړخه په ځان بسیا شي.
یاد هوکړه لیک د (۲۸۵) زره او (۹۰۶) ډالرو په ارزښت د پلان، بهرنیو اړیکو او تقنین رئیس محترم ملا صدوخان حق شناس او د آشیانه مؤسسې رئیس محترم انجنیر محمد یوسف نوابي ترمنځ لاسلیک شو او د سمنګان ولایت د شهیدانو او معلولینو چارو ریاست سره په همغږۍ به د اوو (۷) میاشتو په موده کې پلي شي.
د دې هوکړه لیک د لاسلیک پر مهال محترم ملا صدوخان حق شناس د آشیانه مؤسسې له رئیس څخه یې مننه وکړه او له هغه یې وغوښتل چې د یتیمانو، کونډو مېرمنو او معلولینو لپاره په بېلابېلو برخو کې لا زیاتې مرستې برابرې کړي تر څو د دې اړمن قشر ستونزو ته په ښه توګه رسیدګي وشي.
