د بغلان ولایت د شهیدانو او معلولینو چارو په ریاست کې اداري غونډه ترسره شوه
د بغلان ولایت د شهیدانو او معلولینو چارو رئیس محترم ملا احسان الله عابد په مشرۍ په یاد ریاست کې د چارو د ښه سمون او یتیمانو، کونډو او معلولینو ته د ښو خدمتونو وړاندې کولو په موخه اداري غونډه جوړه شوه، په یادې غونډه کې د اړوند کارکوونکو ترڅنګ د شهیدانو او معلولینو چارو آمر محترم قاري عبدالحکیم نافذ هم شتون درلود.
په دې غونډه کې محترم ملا احسان الله عابد د ۱۴۰۴ مالي کال لپاره د ریاست په موخو، پلانونو، د شهيدانو او معلولينو چارو وزارت د منظور شوې طرحې سره سم د یتیمانو، کونډو او معلولینو د تثبیت او ثبت بهیر او همداراز هغوی ته د غوره او پر وخت خدمتونو د وړاندې کولو په هکله خبرې وکړې.
هغه همداراز د یاد ریاست له کارکوونکو وغوښتل چې خپلې ورسپارل شوې دندې یو الهي امانت وګڼي او له هر ډول غفلت او بې پروايي څخه دې په کلکه ډډه وکړي.
په دې غونډه کې ګډونوالو هم خپل نظريات او غوښتنې شریکې کړې.
د یادونې وړ ده چې د غونډې ګډونوالو ته د کاري بهیر د لا ښه والي په موخه یو ورځنی سیمینار هم وړاندې شو.
