د نوي برېښنايي سیسټم له لارې (۹۶۱۹) تنو یتیمانو، کونډو او معلولینو ته د درې میاشتو نغدي مساعدتونه حواله شوي دي
د شهيدانو او معلولينو چارو وزارت د یتیمانو، کونډو او معلولیت لرونکو وګړو لپاره د نغدي مرستو د وېش په بهیر کې د شفافیت، دقت او چټکتیا د رامنځته کولو په موخه، یوه اونۍ وړاندې د نوي برېښنايي سیسټم د محاسبې او تأدیاتو برخه فعاله کړه.
د یادې برخې له فعالیدو سره سم، د وزارت اړوند د شهیدانو او معلولینو چارو ریاستونو او د کابل ولایت د شهیدانو او معلولینو چارو ریاست له لوري د (۹۶۱۹) تنو یتیمانو، کونډو او معلولیت لرونکو وګړو لپاره د درې میاشتو نغدي مساعدتونه په بریالیتوب سره محاسبه، ترتیب او حواله شوي دي.
یاد برېښنايي سیسټم د مرستو د وېش په بهیر کې د شفافیت د تأمین، د اداري چارو د چټکتیا، د معلوماتو د دقیق ثبت او د مستحقینو لپاره د غوره خدمتونو د وړاندې کولو په موخه جوړ شوی دی.
په پام کې ده چې په نوي برېښنايي سیسټم کې د تأدیاتو او محاسبې برخه به، په نږدې راتلونکي کې د هېواد په نورو ولایتونو کې هم فعاله شي.
