په هلمند ولايت کې د شهیدانو او معلولینو چارو ریاست له لوري د ترسره شویو کړنو او فعالیتونو څخه بررسي ترسره شوه
د شهیدانو او معلولینو چارو وزارت د کورنۍ پلټنې رئیس محترم مولوي محمد انور برادر په مشرۍ یو پلاوي چې د اړوند ریاست درې تنو کارکوونکو هر یو محترم محمد یاسین ادیب، محترم نصیراحمد حکیمي او محترم امین الله امیني یې ملتیا کوله، د هلمند ولایت د شهیدانو او معلولینو چارو ریاست له لوري په ۱۴۰۳ مالي کال کې د ترسره شویو فعالیتونو او کړنو څخه هر اړخیزه بررسي ترسره کړه.
د دې بررسي په ترڅ کې، د شهيدانو او معلولينو چارو رياست ته، په ۱۴۰۳ مالي کال کې د ځانګړې شوې بوديجې د مصرفولو څرنګوالی وڅېړل شو، د مخکيني پلاوي سپارښتنې تعقيب او یتیمانو، کونډو او معلولینو ته د خدمتونو په وړاندې کولو کې شته ستونزې او نیمګړتیاوې وپېژندل شوې.
یاد پلاوي د شهیدانو ورثه وو او معلولینو لپاره د وړاندې شویو خدمتونو څرنګوالی، د هغوی د تثبیت او ثبت بهیر همداراز د یاد ریاست اړوند نورې اداري چارې په هر اړخیز ډول تر بررسي لاندې ونیولې.
همدارنګه یاد پلاوی د خپل سفر په ترڅ کې د هلمند په مرکز، نادعلي، مارجه او په نهر سراج ولسوالیو کې د یو شمېر شهیدانو کورنیو سره یې له نږدې وکتل، د هغوی ستونزې واوریدې او یادو کورنیو سره یوه اندازه نغدي مرسته هم ترسره کړه.
