د شهیدانو او معلولینو چارو وزارت د مسلکي او تخنیکي چارو مرستیال محترم الحاج ملا عبدالرزاق آخند د فدایانو او متعدد مجردو شهیدانو کورنېو د لیدو او پوښتنې په موخه هلمند ولایت ته سفر وکړ
محترم الحاج ملا عبدالرزاق آخند د دې سفر په ترڅ کې د هلمند ولایت په ګرشک، نهرسراج، باباجي، واشېر، نوزاد، مارجه، ناوه، ګرمسېر، خانشين او نادعلي ولسوالېو کې د یو شمېر فدایانو او متعدد مجردو شهیدانو کورنېو سره له نږدې وکتل، د شهیدانو پاک روح ته یې دعا وکړه، د هغوی کورنېو ته یې د ډاډ ګېرنې او خواخوږۍ مراتب وړاندې کړل او ورسره یې یو اندازه نغدي مرستې هم ترسره کړې.
محترم الحاج ملا عبدالرزاق آخند د فدایانو او د متعدد مجردو شهیدانو کورنېو سره په کتنه کې وویل: تاسو د اسلامي نظام د راتلو لپاره قرباني ورکړي دي، اوس د خپل نظام مشرانو ته دعاوې وکړئ ترڅو د اسلامي نظام په پیاوړتیا سره د تللو شهیدانو او د افغان مجاهد ولس ارمانونه پوره شي.
هغه همداراز یادو کورنېو ته يې ډاډ ورکړ: د اسلامي امارت مشرانو تاسو هېر کړي نه یاست، د شهیدانو ورثه ؤ او معلولینو ته د ښو خدمتونو وړاندې کولو په موخه د شهیدانو او معلولینو چارو وزارت رامنځته شوی، د اسلامي امارت مشران او په ځانګړي توګه عالیقدر امیرالمؤمنین حفظه الله تعالی تل دا توصیې کوي چې د شهیدانو کورنېو او معلولینو پوښتنې کوئ او هغوی سره همکاري وکړئ.
محترم الحاج ملا عبدالرزاق آخند د هلمند ولایت شهیدانو او معلولینو چارو ریاست د کاري بهیر څخه یې لیدنه وکړه، د اداري چارو ارزوني ترڅنګ یې د یاد ریاست د کارکوونکو ستونزې او غوښتنې واورېدې او په یو شمېر برخو کي یې د چارو د لا ښه سمون په موخه لازمې لارښوونې وکړې.
د یادونې وړ ده چې د شهیدانو او معلولینو چارو وزارت مرستیال تر دې وړاندې په هرات او بادغیس ولایتونو کې د فدایانو او متعدد مجردو شهیدانو کورنېو پوښتنې او لیدو ته هم ورغلی وو، او هغوی سره یې یو اندازه نغدي مرستې ترسره کړې وې.
