د یتیمانو، کونډو او معلولینو د ثبت په موخه د ارزګان ولایت د شهیدانو او معلولینو چارو په ریاست کې نوی الکټرونیکي سیسټم فعال شو
د شهیدانو او معلولینو چارو وزارت د ډېټابېس او معلوماتو رئیس محترم مولوي باقي بالله فضلي او ورسره مل تخنیکي پلاوي اروزګان ولایت ته یې د سفر په ترڅ کې د یاد ولایت د شهیدانو او معلولینو چارو په ریاست کې د یتیمانو، کونډو او معلولينو نوی الکټرونیکي سیسټم فعال او ګټې اخيستنې ته وسپاره.
په هغه غونډه کې چې په همدې موخه د دې ولایت د شهیدانو او معلولینو چارو په ریاست له کارکوونکو سره جوړه شوې وه، محترم مولوي باقي بالله فضلي د یاد سیسټم د فعالولو په هکله هر اړخیز معلومات وړاندې کړ او يې ویل: د نوي الکټرونیکي سیسټم پر فعالیدو به د یتیمانو، کونډو او معلولینو د ثبت او راجسټر په برخه کې چټکتیا، دقت او بشپړ شفافیت رامنځته شي او د اړوندې برخې له کارکوونکو څخه یې وغوښتل چې له دې سیستم څخه په سمه توګه ګټه پورته کړي.
په دې غونډه کې د ارزګان ولایت د شهیدانو او معلولینو چارو رئیس محترم مولوي عتیق الله منظور د یاد سیستم په فعالیدو خوښي څرګنده کړه او په دې برخه کې یې د شهیدانو او معلولینو چارو وزارت له رهبرۍ څخه مننه وکړه.
