د شهیدانو او معلولینو چارو وزارت د څارنې او ارزونې ځانګړي پلاوي په بامیان ولایت کې د یاد وزارت اړوند ریاست د کړنو او فعالیتونو ارزونه وکړه.
د شهیدانو او معلولینو چارو وزارت د څارنې او ارزونې ځانګړي پلاوي چې په هغه کې د مالي او اداري چارو عمومي رئیس مولوي کلیم الله افغان، د داخلي تفتیش رئیس مولوي احسان الله حقاني، د معلولینو چارو رئیس مولوي عبدالنافع منتفع او همدارنګه د ارزونې او څارنې ریاست استازی هم شامل دی، د بامیان ولایت د شهیدانو او معلولینو چارو ریاست فعالیتونه او کړنې یې په هر اړخیزه توګه وارزولې.
د مالي او اداري چارو عمومي رئیس ښاغلي مولوي کلیم الله افغان د یاد ولایت د شهیدانو او معلولینو چارو ریاست څخه د اروزنې پر مهال یتیمان او معلولیت لرونکي وګړي د ټولنې مستحق او اړمن کسان وبلل او زیاته یې کړه چې د افغانستان اسلامي امارت د دوی پر وړاندې شته ستونزو او ننګونو ته ځانګړې پاملرنه کړې ده. نوموړي د یاد ریاست له کارکوونکو څخه وغوښتل، چې ور سپارل شوي مسوولیتونه دی په ښه توګه ترسره کړي.
نوموړي همدا راز زیاته کړه، اړوند مسوولین دې د یتیمانو د وکیلانو له خوا د یتیمانو حقوقو او امتیازاتو د ورکړۍ څرنګوالې وڅیړي تر څو یتیمان خپل حقوق په ښه توګه ترلاسه کړي. نوموړي د اړوند رياست له کارکوونکو وغوښتل، چې له مراجعينو سره ښه چلند وکړي.
د شهیدانو او معلولینو چارو وزارت د مالي او اداري چارو عمومي رئیس سره راغلي پلاوي د معلولینو او یتیمانو د تثبیت په پروسه کې د روڼتیا د معلومولو او همدارنګه د طرحې سره سم د هغوی د حقوقو د ورکړې په برخه کې له یو شمېر یتیمانو او معلولیت لرونکو وګړو سره له نږدې وکتل او د هغوې څخه یې د شهیدانو وارثینو او معلولینو ته د خدمتونو د وړاندې کولو د څرنګوالي په اړه پوښتنې وکړې.
دا په داسې حال کې ده، چې ياد پلاوي څه موده وړاندې د لغمان ولايت د شهيدانو او معلولينو چارو رياست ارزونه وکړه، په یاده ارزونه کې ۷۰۰ فورمې وپلټل شوې چې په هغوی کې څلور جعلي فورمې تثبیت شوې.
د شهیدانو او معلولینو چارو وزارت د مالي او اداري چاروعمومي رئیس مولوي کلیم الله افغان د بامیان ولایت د شهیدانو او معلولینو چارو ریاست څخه د لیدنې تر څنګ د دغه ولایت له والي مولوي عبدالله سرحدي سره هم وکتل او د شهیدانو وارثینو او معلولینو ته د حقوقو د ورکړې پر څرنګوالي یې خبرې اترې وکړې.
د يادونې وړ ده چې د دغه وزارت د پلټنو پلاوی به د سرپل، بلخ، سمنګان، بغلان او کندز ولايتونو کې د دغه وزارت له اړوندو رياستونو څخه هم څېړنه او ارزونه وکړي.
