د شهيدانو او معلولينو چارو وزارت د پار تکواندو لوبډله وستايله
د شهيدانو او معلولينو چارو وزارت د پار تکواندو لوبډله وستايله
نن د غبرګولې په ۳۰مه، د شهيدانو او معلولينو چارو وزارت د خدمتونو وړاندې کوونکې او ملاتړ مرستيالې جميلې نورستانۍ د معلولينو د پار تکواندو لوبډلې سره ناسته وکړه او هغوی ته يې په لبنان او اردن هيوادونو کې په وروستيو سياليو کې د (۵) طلا او برونزو مډالونو د ترلاسه کولو له امله مبارکي ورکړه او په ډاليو يې ونازول.
آغلې نورستانۍ معلوليت ناتواني نه، بلکه پياوړتيا وبلله او زياته يې کړه، چې ډېر د وياړ او خوشالۍ ځای دی چې په کمو امکاناتو د پار تکواندو لوبډله د اسيا په کچه لوبيږي او د طلا او برونزو پنځه مډالونه ترلاسه کوي.
نوموړې ژمنه وکړه، چې د معلوليت لرونکو لوبغاړو لپاره به امکاناتو ته په کتو، په کور دننه، سيمهييزه او نړيواله کچه د سياليو د ترسراوي په برخو کې اسانتياوې برابرې کړي او د هغوی ستونزو او غوښتنو ته به پر وخت رسيدنه وکړي.
آغلې نورستانۍ د وزارت او پاررالمپيک ملي کميټې ترمنځ د همغږۍ پر زياتوالي ټينګار وکړ او اړونده چارواکو ته يې د دوامدارو همکاريو لارښوونه وکړه.
ورپسې د پار تکواندو لوبډلې لوبغاړو خبرې وکړې او د وزارت له رهبري هييت يې مننه وکړه، چې دوی يې د هڅونې او ملاتړ په موخه وزارت ته را بللي وو.
دوی د معلوليت لرونکو لوبغاړو په استازيتوب خپلې ستونزې، غوښتنې او وړانديزونه له آغلې نورستانۍ سره شريک کړل او وزارت ته يې د همغږۍ زياتولو او ګډکار په تړاو ډاډ ورکړ.
په پای کې آغلې نورستانۍ او اړونده چارواکو مډال راوړونکو لوبغاړو او د لوبډلې مسوولينو ته ډالۍ هم ورکړې.
