ګومارل شوې کميټې ۱۳ زده کوونکي د لوړو زده کړو لپاره بهرنيو تحصيلي بورسونو ته ور وپيژندل
ګومارل شوې کميټې ۱۳ زده کوونکي د لوړو زده کړو لپاره بهرنيو تحصيلي بورسونو ته ور وپيژندل
نن چهارشنبه د وري په ۴مه، د شهيدانو او معلولينو چارو وزارت د ملاتړ او خدمتونو وړاندې کوونکې مرستیالې جميلې نورستانۍ د بورسونو کميټې له غړو سره په ناسته کې، د شهيدانو ورثې او معلوليت لرونکو وګړو څخه په شرايطو برابر (۱۳) کسان د لیسانس لپاره قزاقستان هېواد ته معرفي کړل.
ياده کميټه د يوې مياشتې په بهير کې په دې وتوانيده چې د لوړو زده کړو وزارت له تګلارې سره سم د (۸۰) کسانو له منځه په شرايطو برابر د شهيدانو ورثې او معلوليت لرونکو وګړو څخه (۱۳) زده کوونکي د لیسانس په موخه په بېلا بېلو څانګو کې د دوست هیواد قزاقستان تحصيلي بورسونو ته ور وپيژني.
په شرايطو د برابرو زده کوونکو دغو بورسونو ته د ور پيژندلو بهير د يادې کميټې لخوا د آغلې نورستانۍ په حضور کې ترسره شو، چې وروسته به د يو ځانګړي مکتوب له لارې د لوړو زده کړو وزارت سره د نورو اجرااتو په موخه شريک شي.
د شهيدانو او معلولينو چارو وزارت همېشه هڅه کوي، چې د شهيدانو ورثې او معلولينو لپاره د نورو خدمتونو ترڅنګ، هغوی ته په کور دننه او بهر کې د زده کړو زمينې برابرې کړي.
