د شهیدانو او معلولینو چارو د سرپرست وزیر په مشرۍ د وزارت د رهبرۍ ناسته وشوه
د شهیدانو او معلولینو چارو د سرپرست وزیر په مشرۍ د وزارت د رهبرۍ ناسته وشوه
نن شنبه د (سلواغې په ۱۱مه) د شهیدانو او معلولینو چارو د سرپرست وزیر ښاغلي پوهنمل حمید الله فاروقي په مشرۍ د وزارت د رهبرۍ نوبتي ناسته ترسره شوه، چې د وزارت مرستیالانو، رییسانو، مشاورینو او نورو مسولینو پکې ګډون درلود.
د ناستې په پيل کې ښاغلي فاروقي د هغو ستونزو پر تشخیص ټينګار وکړ، چې د شهيدانو ورثې او معلولينو کارونه له ځنډ او خنډ سره مخ کوي او اړونده چارواکو ته يې لارښوونه وکړه، چې په دې برخو کې دې د حقوقو کتابچو، امتيازاتو او اسنادو پړاوونو تګلارو بیاکتنه وشي، څو له مخې يې د چارو په چټکتيا کې د پاموړ اسانتياوې راولو.
ښاغلي فاروقي زیاته کړه، چې که د چارو اړوند قانوني خنډ رامنځته کېدو، لومړۍ بايد په ګډه يوه اصولي حللاره ورته ومومو او د نه موندلو په صورت کې به د قوانينو د تعديل په اړه هم لازم اقدامات ترسره کړو.
د رهبرۍ غړو هم د خپلو برخو اړوند مسایل، ستونزې، غوښتنې او وړانديزونه د وزارت مشرتابه سره شریک کړل، څو د حل په صورت کې يې چارې په معياري ډول پر مخ ولاړې شي.
د ناستې په پای کې پرېکړه وشوه، چې د يوې ځانګړې کميټې په چوکاټ کې به د شهيدانو ورثې او معلولینو د کتابچو او د کلنيو حقونو د ترلاسه کولو پر تګلارو له سره کتنه وشي او پر پايلو او لاسته راوړنو يې په وروستيو ناستو کې خبرې اترې وشي.
