د شهیدانو او معلولینو چارو وزارت له لوري پر (۷۰۶) مستحقو کورنيو باندې د قربانۍ غوښې وویشل شوې
د یتیمانو، کونډو او معلولینو د ملاتړ په موخه، د شهیدانو او معلولینو چارو وزارت د HHRD خیریه مؤسسې سره په همغږۍد کابل ولايت اړوند د شهيدانو، معلولينو او مهاجرينو پر (۷۰۶) مستحقو کورنيو باندې د قرباني غوښې ووېشلې.
د یادو مرستو د وېش بهیر د ټولنیزو خدمتونو د تنظیم رئيس محترم مولوي ثناء الله فرقاني، د ټولنیزو خدمتونو د تنظیم آمر محترم صفي الله سدید او د مؤسسې د مسؤلينو په شتون کې په منظم او عادلانه ډول ترسره شو.
د شهیدانو او معلولینو چارو وزارت د لوی اختر د لومړۍ او دوهمې ورځې په مناسبت هم، د یو انسان دوستانه او د خواخوږۍ ډک اقدام په ترڅ کې، د قربانۍ غوښې، زرګونو تنو یتیمانو، کونډو مېرمنو، معلولینو او نورو اړمنو کسانو ته وویشلې. دا ارزښتناک نوښت د دې لپاره ترسره شو چې یادې کورنۍ د لوی اختر په خوښیو کې شریکې شي او هېڅوک د دې مبارکو ورځو له برکته او خوښیو څخه بې برخې پاتې نه شي.
