د شهیدانو او معلولینو چارو وزارت د یتیمانو، کونډو او معلولیت لرونکو وګړو د ملاتړ او لاسنيوي په موخه د اچ، اچ، آر، ډي مؤسسې سره هوکړه لیک لاسلیک کړ
یاد هوکړه لیک د شهیدانو او معلولینو چارو وزارت د بهرنيو اړیکو او پلان رئیس محترم ملا صدوخان حق شناس او د اچ، اچ، آر، ډي مؤسسې د استازي محترم همایون نوري ترمنځ لاسلیک شو، چې له مخې به یې په کندز، هلمند، میدان وردک، ننګرهار او لوګر ولایتونو کې (۱۶۵۰) تنو یتیمانو، کونډو او معلولینو لپاره اته (۸) ډوله خوراکي توکي چمتو او ووېشل شي.
محترم ملا صدوخان حق شناس د یادې مؤسسې له مسؤل څخه د یتیمانو، کونډو او معلولینو لپاره د مرستو د چمتو کولو په پار مننه وکړه او زياته یې کړه: یتیمان، کونډې او معلولین د ټولنې هغه قشرونه دي، چې ځانګړې پاملرنې ته اړتيا لري او باید د هغوی څخه په سمه توګه ملاتړ وشي.
محترم همايون نوري د اچ، اچ، آر، ډي مؤسسې استازي هم ژمنه وکړه، چې د شهيدانو او معلولينو چارو وزارت سره په همغږۍ به د مرستو برابرولو په برخه کې نورې هڅې هم وکړي.
د یادې پروژې مجموعي لګښت (۷) میلیون او (۶۱۸) زره او (۳۸۰) افغانۍ کېږي چې د يادو ولايتونو د شهيدانو او معلولينو چارو رياستونو په همغږۍ به تطبیق شي.
