د شهیدانو او معلولینو چارو وزارت د یو شمېر یتیم ماشومانو او کونډو لپاره د سرپنا جوړولو په موخه د(HHRD) خیریه مؤسسې سره هوکړه لیک لاسلیک کړ
د همکارۍ دغه هوکړه لیک د شهیدانو او معلولینو چارو وزارت د پلان، پالیسۍ او بهرنېو اړیکو رئیس محترم ملا صدوخان حق شناس او د (HHRD) خیریه مؤسسې سوپروایزر محترم عبیدالله احمدي ترمنځ لاسلیک شو، چې د هغه پر اساس به (۲۹) تنو یتیمانو او کونډو لپاره په کابل او ننګرهار ولایتونو کې مناسب کورونه جوړ شي.
د دې پروژې د تطبیق مجموعي لګښت (۱۷۵۰۰۰) امریکایي ډالره دی چې د کابل ولایت اړوند ده سبز ولسوالۍ او همداراز د دې ښار په اتمې، نهمې، دولسمې او د ننګرهار ولایت د بټي کوټ په ولسوالۍ کې به د درېيو میاشتو په موده کې پلي شي.
د یادونې وړ ده چې د دې هوکړه لیک له مخې به، د هر مستحق لپاره یو کور چې دوه خونې، همداراز یو دهلیز، یو تشناب او پخلنځی ولري په معیاري ډول جوړ او ګټې اخیستنې ته به وسپارل شي.
